Axad, , October, 28, 2018 (HOL) – Maamul
gobollleedka Jubbaland ayaa faah faahin dheeraad ah ka bixiyay dagaal shalay
bartamaha magaalada ku dhaxmaray ciidamo ka wada tirsan Jubbaland, kaa oo
sababay khasaare isugu jira dhimasho iyo dhaawac.
Afhayeenka laamaha Amaanka Jubbaland Saciid Cabdi
Joogsade oo la hadlay VOA ayaa sheegay xaalada magaalada waqtiga tahay mid
degan, waxaana uu intaa ku daray in gacanta lagu soo dhiggay 11 askari oo ka
qeyb ka ahaa dagaalkii shalay maalmihii ugu danbeeyay-na magaalada ka waday
ayuu yiri khalalaase iyo falal nabad-galyada ka dhan ah.
‘’Ciidamada dagaalamay labada dhinac-ba waxaa ay
ka tirsanaayeen Jubbaland, iska horimaadka ayaa ka danbeeyay howlgal ciidamadu ay
ka wadeen guud ahaanba xaafaddaha ay magaaladu ka kooban tahay oo ay isku
dayeen qeyb kale oo ka mid ah ciidamada daraawiishta Jubbaland in ay is
hortaagaan’’ ayuu yiri afhayeenka.
Saciid Joogsade ayaa sidoo kale ciidamada la
dagaalamay kuwa maamul gobolleedka Jubbaland ku eedeeyay in ay si bareer ah u
toogteen nabadoon caan ka ahaa magaalada oo isku dayay ayuu yiri in uu kala
hadlo falalka amaan darro oo ay ka wadeen magaalada.
‘’Waxey toogasho ku dileen nabadoon, waan ka
tacsiyeey-neynaa, geerida nabadoonka, howlgalka-na dhamaanba waxaa lagu soo
qabtay ciidamadii qalalaasaha ka sameeyay magaalada, waana maxkamad sugayaal’’
ayuu yiri afhayeenka laamaha Amniga.
Goobjoogayaal ayaa sheegay in dagaalka shalay uu
ahaa mid culus oo bartamaha magaalada leysku weydaarsaday hub culus oo ay
madaafiic ka mid ahaayeen.
C/raxmaan Diini, Hiiraan
Online
[email protected]
