Maqaayadaha xeebta Liido oo la mamnuucay in lagu caweeyo saqda dhexe ee habeennimo
Khamiis, October, 25, 2018 (HOL) –Maamulka
gobolka Banaadir ayaa sheegay in aan la oglaan doonin wixii ka danbeeyay 12
habeennimo in lagu caweeyo hoteellada iyo maqaayadaha ku yaala xeebta Liido ee
magaalada Muqdisho.
Duqa Muqdisho Cabdiraxmaan Yariisoow ayaa sheegay
in ay jiraan falal ka baxsan Diinta Islaamka iyo anshaxa suuban oo ka dhacay
Xeebta Liido, sidaa daraadeed maamulku mamnuucay in xiliyada danbe ee habeenkii
halkaa ku kulmaan bulshada.
“Maamulka Gobolka Banaadir isagoo tixgelinaya
cabashooyin kala duwan oo kasoo gaaray bulshada, waxuu joojiyay in wixii ka
danbeeya 12ka Saqda dhexe aysan furnaan karin makhaayadaha ku yaalla Xeebta
Liido. Makhaayaddii ama Hoteelkii lagu helo wax ka soo horjeeda Diinteena,
anshaxa suuban iyo Dhaqanka Soomaaliyeed waa la xiri doonaa”.
Guddoomiyaha Ururka haweenka gobolka Banaadir
Jawaari Baarqab ayaa horay u sheegtay in ay jiraan hoteello iyo goobo ganacsi
loo furtay oo magaalada Muqdisho oo ay ka dhacaan falal aan ku habooneyn
shareecada Islaamka iyo dhaqanka Soomaalyeed intaba, sidaa daraadeed looga
baahan yahay maamulka gobolka Banadir in uu arintaa tallaabo ka qaado.
“Xeebta Liido waa goob shacabku isagu yimaado laguna nasto ,mana lagu
isticmaali karo wax maandooriye ah noocuu doono ha-ahaadee, cid walba oo
falkaas ku kacdana, waxaa Hay’adaha amniga la farayaa in tallaabo ay ka qaadaan
sharcigana horkeenaan” ayaa lagu yiri warka ka soo baxay maamulka gobolka
Banaadir.
Xeebta Liido ayaa waxaa ka furan makhaayado iyo goobo lagu caweeyo, waxaana
dhalinyarada ku qaataan illaa sada dhexe habeenii, iyadoo dadka deegaanka ay
muddooyinkii u dambeeyay ka soo sheegayeen falal anshax darro ah.
C/raxmaan Diini, Hiiraan
Online
[email protected]
