Baydhabo oo ay isugu tagaan musharixiin madaxweyne iyo loolan siyaasadeed oo soconaya
Talaado, October, 23, 2018 (HOL) –Olole doorasho
iyo loolan siyaasadeed oo aad u xoogan ayaa ka socda magaalada Baydhabo ee
xarunta gobolka Baay oo ay isugu tageen musharixiin u taagan doorashada
madaxweynaha Koonfur Galbeed oo dhici
doota 17ka bisha November ee sanadkan.
Musharixiinta qaarkood ayaa la leeyahay waxaa ay
taageero xoogan ka heystaan dowladda federaalka, halka kuwa kalana iskood u
sharaxan yihiin, waxaa sidoo kale loolanka qeyb ka ah madaxweynaha xiliggan ee
Shariif Xassan Sheekh Aadan.
Shalay waxaa gaaray Baydhab musharax Cabdicasiis
Lafta-Gareen oo ah wasiir iyo xildhibaan ka tirsan dowladda dhexe, iyadoo
tagistiisa Baydhabo ay badashay guud ahaanba jawiga magaalada.
Maamulka Koonfur Galbeed ayaa ku eedeeyay
dowladda Soomaaliya in ay far-galin buuxa ku heyso doorashada, islamarkaana
Baydhabo u dirtay hub iyo ciidan la doonayo in lagu carqaladeeyo doorashada.
Musharixiinta waxaa ka mid ah Mukhtaar Rooboow
Cali Abuu-Mansuur oo horay dowladdu uga mamnuucday in doorashada uu ka
qeybgalo, laakiin wali waa musharax, isaga oo iska diiday go’aanka dowladda.
Madaxweynaha Koonfur Galbeed Shariif Xassan
Sheekh Aadan oo dhinaca kale lagu yaaqaanno in uu yahay shaqsi galaangal fiican u
leh siyaasada marka ay jiraan xaalada noocan oo kale ah, ayaa markan cadaadis
xoogan kala kulmi doona musharixiin dhowr ah oo laga yaabo in ay awoodooda
isugu geeyaa meel kaliya.
Halka shiishka musharixiintu uu wada saaran yahay
ayaa ah xildhibaannada baarlamaanka Koonfur Galbeed oo ah kuwa ugu danbeeya ee
lagu kala baxayo maalinta codbixinta, waana tan keentay in musharixiinta qaar-kood
goor horeba sii bilaabaan xodxodasha xildhibaannada.
Doorashadan ayaa noqo doonto mid xiiso leh oo si
gaar ah isha loogu wada hayo madaama ay isku arki doonaan musharixiin kala
siyaasada iyo ajande duwan.
C/raxmaan Diini, Hiiraan
Online
[email protected]
