Jaamacadda UPEACE hoostagta QM iyo Machadka SDRI oo kala saxiixday heshiis Waxbarasho
Sabti, October, 20, 2018 (HOL)– Jaamacadda caalamiga ah
ee University for Peace (UPEACE) oo hoos tagta Q/Midoobay oo kaashaneysa
Machadka daraasaadka & Maareynta Masiibooyinka Soomaaliyeed (SDRI) ayaa magaalada
Muqdisho si rasmi ah uga furay barnaamij Waxbarasho sare oo loogu talo galay in
ay ka faa’ideystaan ardayda dhameysata waxbarashada heerka koowaad ee
Jaamacadaha dalka.
Talaabadan ayaa timid ka dib markii labada dhinac ay
14kii bishii August ee sanadkan 2018 kala saxiixdeen heshiis iskaashi oo
dhigaya in Jaamacadda University for Peace ay bixiso illaa 11 taqasus iyo labo
Maado oo lagu bixinayo shahaadada sare ee Phd-da, iyadoo la kaashaneysa
Machadka SDRI.
Munaasabad lagu daah-furayey barnaamijkan ayaa lagu
qabtay magaalada Muqdisho, taasoo ay ka qeyb galeen masuuliyiin kala duwan,
iyadoo sidoo kale lagu soo dhoweynayey dufcadii ugu horeysay ee isku diiwaan
gelisay qeybaha Waxbarashada heerka labaad (Master Degree) iyo heerka
saddexaad (Phd) kuwaasoo tiradoodu gaareyso 150 arday oo isugu jiray hablo iyo
wiilal.
Agaasimaha Machadka SDRI Maxamed Cismaan oo furitaankii
xafladaas ka hadlay ayaa sheegay inuu ku faraxsan yahay markii ugu horeysay
iney dalka timaado Jaamacadda University for Peace oo uu xusay iney tahay Jaamacad
caalami ah oo ay leedahay QM.
“Kadib dedaal muddo badan socday oo ay sameysay SDRI
waxaan ku guuleysanay in markii ugu horeysay aan dalka keeno Jaamacada UPEACE
oo bixisa shahaado caalami ah oo ay aqoonsan yihiin dhamaan heyadaha UN-ka, si
ay uga faaiideystaan ardayda dalkeena ee Jaamacadaha dhameystay” ayuu yiri
agaasimaha oo ku dheeraaday qaabka ay ku wada shaqeyn doonaan heyadiisa SDRI
iyo Jaamacada UPEACE.
Ambasaddor C/llaahi Odowaa oo ah danjiraha cusub ee
Somalia u fadhin doona dalka Kuwait, kana mid ah aqoonyahanada Soomaaliyeed ee
ka qelin jebiyey Jaamacadda UPEACE xarunteeda dalka Costa-rica oo isna hadal ka
jeediyey munaasabada ayaa sheegay in ardayda ka baxday Jaamacadaha dalka ay
heystaan fursad dahabi ah maadaama ay dalkooda xarun ka furatay Jaamacada
UPEACE, wuxuuna xusay iney jiraan dalal Somalia ka horumarsan oo aan weli
fursadan helin, isagoo ugu baaqay ardayda Soomaaliyed iney ka faaiideystaan.
Guddoomiye ku-xigeenka dallada Jaamacadaha Soomaaliyeed
(SomaliREN) Prof/Dr. C/risaaq Axmed Dalmar oo isna munaasabada hadalo ka
jeediyey ayaa sheegay iney soo dhoweynayaan iskaashiga waxbarasho ee dhexmaray
Machadka SDRI iyo Jaamacada UPEACE oo uu sheegay inuu xoojinayo
horumarinta iyo kobcinta bahda tacliinta ee dalkeena.
“Heyadaha UN-ka ee dalka jooga shaqaalahoodu waxay u
badan yihiin dad ajnabi ah, ardayda ka faa’ideysata barnaamijkan waxay heystaan
fursadaha ugu wanaagsan ee ay uga mid noqon karaan howlwadeenada heyadahaas,
maadaama ay heystaan shahaado ay bixisay Jaamacad ay leedahay Qaramada
Midoobay” ayuu yiri Dr. Dalmar oo bogaadiyey dedaalka iyo iskaashiga ay
sameeyeen labada heyadood.
Waxaa ugu dambeyn munaasabadaas ka hadlay Prof. Samuel
Kale oo ah madaxa Afrika u qaabilsan Jaamacadda UPEACE oo xusay iney ku
faraxsan yihiin markii ugu horeysay in Jaamacadiisu ka howlgasho Somalia,
isagoo ka mahad celiyey sida dalka loogu soo dhoweeyey wuxuuna xusay in
Jaamacaddan ay tahay mid aqooneed oo aan wax shaqo ah ku laheyn Siyaasad.
“Jaamacadda University for Peace (UPEACE) waxaa la asaasay
5tii bishii Disembar sanadkii 1980kii ka dib go’aan ka soo baxay Qaramada
Midoobay, xarunteeda dhexe waxay ku taalla dalka Costa-rica, waxayna xarun
goboleedyo iyo faracyo ku leedahay dalal badan oo ku baahsan caalamka, qeybta
Afrika ee aan madaxda ka ahay xarunteeda waa Addis ababa, waajibaadka nala
siiyey waxaa ka mid ah xoojinta awooda Jaamacadaha Afrika, dhinaca aqoonta,
Cilmi-baarista iyo arrimaha bulshada” ayuu yiri Prof.
Samuel Kale oo intaa ku daray inuu ku faraxsan yahay
heshiiska iskaashi ee dhexmaray jaamacadiisa iyo heyadda SDRI, isagoo
balan-qaaday in ardayda la siin doono aqoon tayo sare leh iyo shahaado aqoonsi
caalami ah heysata.
Masuuliyiinta Jaamacadda UPEACE iyo heyadda SDRI
ayaa ugu dambeyn si saraaxad leh uga jawaabay su’aalo ay weydiiyeen qaar ka mid
ah ardayda iyo aqoonyahanada ka qeyb galay Munaasabadaas oo ku soo dhamaatay
jawi farxad badan.
C/raxmaan Diini, Hiiraan
Online
[email protected]