Talaado, October, 16, 2018 (HOL)- Xoogag hubeysan oo ka
tirsan xarrakada Al-shabaab ayaa xalay saqdii dhexe weerar culus ku qaaday
magaalada Jowhar ee xarunta maamul gobolleedka Hirshabeelle.
Goobjoogayaal ayaa Hiiraan Online u sheegay in dagaalmayaal ka tirsan
Al-shabaab xalay labo jiho ka soo weerarreen fariisimo ay lahaayeen ciidamada
dowladda, waxaana la sheegay in askari ka tirsanaa ciidamadii ilaalada ka ahaa
koontaroolka ay weerarreen xoogaggan uu goobta ku dhintay.
Fariisimaha la weerarray ayaa la sheegay in aysan ka fogeyn xarunta madaxtooyada
Hirshabelle, waxaana xarunta degan madaxda ugu sareysa maamulka.
Magaalada Jowhar waxaa maalintii shalay booqday ra’iisal wasaaraha
xukuumadda Soomaaliya Xassan Cali Kheyre oo dhagaxdhiggay mashaariic
hormarinneed.
Ilaa iyo hadda ma jiro wax faah faahin ah ka soo baxay laamaha amniga maamulka Hirshabeeelle iyo guud ahaanba saraakiisha ciidamada dowladda Soomaaliya oo la xiriira weerarrka xalay dhacay.
C/raxmaan Diini, Hiiraan Online
[email protected]
