Isniin, October, 01, 2018 (HOL)- Ciidamada
dowladda Soomaaliya ayaa guulo ka sheegtay howlgalo saacadihii ugu danbeeyay ay
ka fuliyeen deegaanno ka tirsan gobollada Jubbooyinka iyaga oo sheegay in ay
dileen Shan ruux oo ka tirsanaa dagaalamayaasha Al-shabaab.
Saraakiisha ciidamada dowladda
ayaa sheegay in Al-shabaab ay ka xoreeyeen deegaanno dhowr ah oo ka tirsanaa
Jubbooyinka, gaar ahaan howlgalka xooggiisa ayaa ka dhacay deegaanno qiyaastii
70km u jira magaalada Kismaayo.
‘’Ciidamadee-nu waxaa ay hormar
ballaaran ka sameynayaa howlgalka ka socda gobolka, waxaan dilnay shan ka
tirsanaa dagaalamayaasha Al-shabaab kuwa kalana waa dhaawacnay, dhinaceenna
labo askari ayaa nooga dhaawacmay howlgalka ayu yiri’’ Yuusuf Xusseen Cismaan oo u hadlay ciidamada.
Deegaannada ay ciidamadu gaareen
waxaa ka mid ah Bangini, Mana-mufo
iyo Koban oo ku yaala Jamaame, kana mid ahaa deegaannada ugu muhiisan oo
ay Al-shabaab ka maamulayeen gobolka Jubbada Hoose.
Ilaa iya hadda Al-shabaab wax war
ah kama aysan soo saarin howlgaladan ka socda gobollada Jubbooyinka oo ay
wadaan ciidamada dowladda iyo kuwa maamulka Jubbaland.
C/raxmaan Diini, Hiiraan
Online
[email protected]