Shariif Xassan : Xildhibaannadii Koonfur Galbeed markii ay ogolaadeen in Muqdisho lagu tashkiiliyo ayaan ogolaaday in aan is casilo
Khamiis, November, 08, 2018 (HOL)–
Shariif Xassan Sheekh Aadan oo galinkii danbe ee maalintii shalay uga dhawaaqay
magaalada Baydhabo in uu iska casilay xilkii madaxweynaha ayaa ka hadlay
sababta uu go’aankan u qaatay.
‘’Xildhibaannadii Koonfur Galbeed
ee aan sida wanaagsan u soo wada shaqeynay markii ay ogolaadeen Muqdisho looga
yeero Muqdisho lagu tashkiiliyo ayaan Anniggana ogolaaday in iska casilo xilkii
madaxweynaha kana baxo doorashada’’ ayuu yiri Shariif Xassan Sheekh Aadan.
Dowladda ayuu sheegay in ay garan
weyday xitaan in magaalada Baydhabo ay ka dhax- sameyso ololaheeda doorasho,
waxaana uu wax laga xumaado uu ku tilmaamay in xildhibaannada oo dhan leysugu
geeyo magaalada Muqdisho.
‘’ Haddii ay xildhibaannada iyaga
oo jooga Baydhabo i-diidi-lahaayeen Santuuqa doorashada ayaan ku kala bixi
laheyn, laakiin iyaga aan ogeyn sabab loogu yeeray iyo cidda u yeertay markii
ay Muqdisho isugu tageen ayaan goostay in aan go’aankan qaato, dowladda
Soomaaliya-na waxaan leeyahay dadka haloo dhaxeeyo’’ ayuu hadalkiisa sii
raaciyay Shariif Xassan.
Shariif Xassan oo sanadihii ugu
danbeeyay siweyn uga dhax muuqda siyaasada Soomaaliya ayaa markan u muuqda in
uu ka baxay nidaamka Koonfur Galbeed, laakiin dhinaca kale dadka siyaasada
falan-qeeya ayaa qaba in uusan sidaa siyaasada uga bixin, lagana yaabo in uu
dib ugu laabto Kursiggiisii hore ee Golaha Shacabka.
Ku-simaha madaxweynaha ahna
guddoomiyaha Baarlamaanka Koonfur Galbeed Cabduqaadir Shariif Sheekhu-naa Maye
ayaa hadda laga sugayaa in uu dib u soo magacaabo guddi doorasho oo shaacin
doona jadwalka iyo waqtiga ay dhaceyso doorashada.
C/raxmaan Diini, Hiiraan
Online
[email protected]
