Jimco, November, 30, 2018 (HOL) – Guddoomiyaha
Baarlamaanka Soomaaliya Maxamed Mursal Sheekh Cabdiraxmaan ayaa tallaabo qalad
ku tilamaamay ciidamo dowladda federaalka ku dirtay magaalada Baydhabo isaga oo
dhinaca kale sheegay in Mukhtaar Rooboow xaq u leeyahay ka qeybgalka doorashada
madaxweynaha Koonfur Galbeed.
Isaga oo wareysi siinayay Laanta Afka Soomaaliga
ee VOA ayuu sheegay in magaalada Baydhabo joogaan ciidamo ku filan oo Amniga
sugi kara, sidaa daraadeed aysan meesha oolin sabab ciidamo kale loogu dirro.
‘’Deegaanka wey joogaan ciidamo ku filan Amniga doorasahada
sidaa daraadeed cidda dirtay ciidamadan kale ee dheeraadka iyo ujeedada laga
leeyahay iyada ayaa lagala xisaabtamayaa’’ ayuu yiri guddoomiye Mursal.
Waxaa uu meesha ka saaray in uu jiro musharax
gaar ah oo ay dowladdu wadato oo ka qeybgalaya doorashada la filayo in ay
dhacdo todobaadka danbe isaga oo yiri ‘’ma jiro musharax gaar ah oo ay dowladda
federaalka wadato’’
Arrintan Mukhtaar Rooboow iyo cadaadiska uga
imanaya dowladda federaalka mar uu soo hadal qaaday ayuu yiri guddoomiye Mursal
‘’ “Muqtaar Roobow waa muwaadin soomaaliyeed dowlada iyadaa heshiis la gashay
iyadaa keentay Muqdisho xerada nabadsugida ayuu degenaa ogaal la’aan meeshaas
kuma tegin, musharax ayuu noqday shahaadana waa la siiyay xaq ayuu u
leeyahay inuu u tartamo dowlada haddii ay ujeedo kale ka leedahay sanad ka
badan muqdisho ayuu joogay.”
Sidoo kale waxaa uu meesha saaray in ay dhici
karta saacadaha ugu danbeeya in dowladdu cadaadis ku saari doonto Rooboow in
uusan ka qeybgali doorashada ayuu yiri’’ Dowlada xaq uma lahan hadduu Muqtaar
soo gaaro xilligan inay faro geliyaan waa qalad.”ayuu yiri Maxamed Mursal
Sheekh Cabdiraxmaan oo lagu wado in uu caasimada dalka uu dib ugu soo laabto
berri oo Sabti ah.
Magaalada Baydhabo ayaa maanta la geeyay ciidamo Booliis ah oo si gaar ah u
tababaran kuwaa oo la sheegay in ay ka qeybqaadanayaan sugida Amniga
doorashada.
C/raxmaan Diini, Hiiraan
Online
[email protected]
