Jimco, November, 30, 2018 (HOL) – Wararka ka
imanaya gobolka Shabeellaha Hoose ayaa sheegaya in halkaa uu ka soconayo
howlgal qorsheysan oo ka dhan ah Al-shabaab sida uu sheegay guddoomiyaha gobolka
Maxamed Ibraahim Barre.
Howlgalka oo ay wadaan ciidamada xoogga dalka
Soomaaliyeed oo kaashanaya kuwa midowga Africa ayaa ka socda deegaanka lagu
magacaabo Gandarshe ilaa laga gaaro Jilib-Marka halkaa oo ay ku xoogan yihiin
dagaalamayaasha Al-shabaab.
Sidoo kale ciidamada ayaa howlgal ka wada waddada
laamiga ah iyo jidadka isku xira No 50 iyo No 60 ee gobolka Shabeellaha Hoose,
waxaana uu guddoomiyuhu intaa ku daray in deegaannada qaar laga sifiyeeyay
Al-shabaab.
Guddoomiyaha oo faah faahin ka bixinayay sida ay
markii horeba ugu suurtagasha Al-shabaab in ay isku ballaarinayaan deegaanno
intaa la eg ayuu yiri’’ Markii laga saaray magaalada Marka iyo deegaannada
xeebta ah ayeey bilaabeen in ay halkaa ku dhuumaaleystaan, laakiin hadda
qorshuhu waxaa uu yahay in laga sifeeyo’’ ayuu yiri guddoomiye Barre.
Gobolka Shabeellaha Hoose ayaa ka mid deegaannada
ku xoogan yihiin dagaalamayaasha Al-shabaab oo weerarro ba’an ku qaadan
fariisimaha ciidamada dowladda iyo kuwa howlgalka midowga Africa AMISOM.
C/raxmaan Diini, Hiiraan
Online
[email protected]