Xildhibaan ka tirsan Golaha Shacabka oo sheegay in looga soo hanjabay dhinaca Xukuumadda
Arbaco, November, 28, 2018 (HOL) –Xildhibaan
Cabdullaahi Maxamed Nuur oo ka mid ah mudanayaasha Baarlamaanka Soomaaliya ayaa
warbaahinta u sheegay 48 –dii saac ee la soo dhaafay fariimo kala duwan oo
loogu hanjabayo uga imaanayeen madaxda
ugu sareysa dalka.
Gaar ahaan waxaa uu farta ku
fiiqay xukuumadda oo sida uu sheegay si toos ah u soo gaarsiisay maalmihii ay
socdeen dooddaha ku saabsanaa warbixintii guddiga maaliyada fariimo loogu
hanjabayo, qaarkood-na sida uu hadalka u dhigay si toos ah loola hor-yimid.
‘’Runtii waan maqli jiray,
laakiin waligey ma rumeysan in arrimahan oo kale dhici karaan, waxaa socda hajabaado joogta ah lagu hayo
laga soo bilaabo Warbaahinta, Dadka Shacabka ah, Mas’uuliyiinta dowladda
qaarkood, waxaa xusid mudan in maalmihii ugu danbeeyay oo ay socdeen Dooddaha
Baarlamaanka in ay bar bar soctay hajabaad
Amni, ‘’ ayuu yiri Cabdullaahi Axmed Nuur oo intaa ku daray in isaga si toos ah
loogu hanjabay.
Ma uusan sheegin xildhibaanka cid
gaar ah oo hajabaadan u soo dirtay marka laga reebo in uu eedeyntiisa u
jeediyay xukuumadda oo kaliya, sidoo kalana ma uusan sheegin uu la wadaagay
arintan laamaha Amniga oo ay quseyso.
‘’Annigu ma’ahi qof hanjabaadaha
u nugul, laakiin waxaan rabaa in aan shacabka Soomaaliyeed la wadaago in arintasi
jirto oo toos ah Anniga iigu dhacday’’
ayuu hadalkiisa sii raaciyay.
Dhawaan ayuu xildhibaanku
baarlamaanka ka dhax sheegay in xukuumadda Soomaaliya fara-galin ba’an ku heyso
howlaha Baarlamaanka gaar ahaan Guddiga Maaliyada, isaga oo ku eedeeyay in
xukuumaddu sabab u aheyn in 10 xubnood oo guddiga ka mid ah sheegay in aysan
waxba kala socon warbixintii uu guddigu soo saaray ee aheyd in lunsaday lacago
Malaayiin dollar ah.
Waa markii ugu horeysay oo
xildhibaan ka ka tirsan Golaha Shacabka uu sheego in si toos ah looga soo
hanjabay xafiis-yada madaxda ugu sareysa dalka gaar ahaan xukuumadda.
C/raxmaan Diini, Hiiraan
Online
[email protected]
