Naceybka Muslimiinta Mareykanka iyo korarka xafladaha Qalin-Jabinta Diinta oo sii badanaya
Isniin, November, 26, 2018 (HOL)-Mu’tamarka sanadlaha ah ee uu qabto sanad walba Islamic Center of St. Cloud ayaa usbuucaan lagu qabtay xarunta weyn ee shirarka ee magaalada St. Cloud. Kulankan balaadhan, ayaa lagu maamuusay qalin-jabinta 48 arday, kuwaas oo ku dhammeeyay quraanka kariimka ah magaalo aanay laga jecleyn muslimiinta.
Mu’tamarkan oo sanadle ah ayaa asteynaya kulankii
1o-naad. Waxaana ka mid ahaa ardaydii qalinjabisay gabar yar oo sagaal
sano jir ah, iyo hooyo weyn oo ilmaheeda qayb ka mid ah ay macallimiinta
madarasadaan ay ka yihiin.
Markaskan waxaa dhigata 1,800 oo arday, wuxuuna ku
yaallaa magaalo dadka muslimiinta ah ay ku yaryihiin, magaaladaas oo
si weyn looga soo codeeyay madaxweyne Donald Trump dooarshadii 2016-kii.
Xafladan waxaa ka soo qayb gelay dadweyne aad u fara
badan, kuwaasoo ay ka muuqatay qanac weyn iyo shucuur qiiro huwan. Culumadii
lagu marti qaadayna waxaa ka mid ahaa Sheekha weyn ee Soomaaliyeed,
ee Sh. Cabdirahman Sheikh Cumar, halkaasna waxa uu ka soo jeediyay muxaadaro qiimo badan oo isugu
jirta talooyin, tusaaleyn iyo tilmaamo togan oo tiigsan karo. Ardada
machadka Iimaan ayaa iyaguna waxa ay soo bandhigeen diintii ay barteen.
Qaybo kamida ardada ayaa waxa ay ka akhriyeen madasha
aayadu quraan ah oo aad u soo jiitay dhagaha dadkii goobta joogay, meesha
qaybo kale oo ardada ka mid ah ay soo jeediyeen muxaadarooyin diirran
oo English iyo Carabi isugu jiray.
Intii ay socotay xafladda ayaa ardayda machadka waxa
ay soo bandhigeen ruwaayad kooban oo xiisa badan, taasoo ka turjumaysa
sida sahlan ee diinta iyo wax barashada looga lumin karo carruurta muslimiinta
ah ee ku nool qurbaha iyo sida ay ugu jilicsanyihiin inay duufsadaan
Shayaadiinta.
Islamic Center of St. Cloud, ayaa la aasaasay sanadkii 1996-kii, marba marka ka danbaysana ardada
iyo qoysaska Soomaalida ayaa ku soo badanaysa magaaladan St. Cloud guud
ahaan. Maamulka iyo macallimiinta aan kula kulanay St. Cloud ayuu ka
muuqday dareen qota dheer iyo dadaal dheeri ah. Waxa ayna u sheegeen
HOL in ay sii laba laabi doonaan u adeegga diinta Islaamka iyo badbaadinta
dhallaanka muslimiinta ah inta ay kari karaan idinka Ilaahay.
Mohamud Dulyadeyn
Hiiraan Online
[email protected]
