Al-shabaab oo sheegtay mas'suuliyada Qaraxyo saakay ka dhacay magaalada Gaalkacyo
Isniin, November, 26, 2018
(HOL)- Xoogagga Al-shababa ayaa sheegtay mas’uuliyada Qaraxyo culus iyo weerar
toos ah oo saakay lagu qaaday xarun uu Koonfur magaalada Gaalkacyo ka deganaa
Wadaad lagu magacaabo Cabdiwali Cali Calmi Yare.
Al-shabaab ayaa qoraal ay soo
saareen ku sheegay in weerarkaasi ay ku dileen sida ay hadalka u dhigeen
Cabdiwali Cali Calmi oo xaruntaasi maamulayay, iyaga oo ku eedeeyay
islamaarkaan sheegay in uu ahaa shaqsi Nibinimo sheegtay.
Sidoo kale Al-shabaab ayaa
sheegay in weerarka ay ku dileen 11 ruux oo ilaalo u ahaa Wadaad, waxaana sidoo
kale jira tiro badan oo dhaawacyo ah oo loo qaaday isbitaallada magaalada
Gaalkacyo.
Xarunta la weeraray ayaa
saldhig u aheyd kooxo dhalinyaro ah oo isugu jiray Wiil iyo Gabdho da’yar
halkaa ku qaadi jira digri lagu laray Music, waxaana erayada ay ku luqaayaan ka mid ahaa Aayado Qur’aan ah taasoo dad badan siweyn uga xumaadeen.
Sidoo kale Wadaadkan ayaa mar
ka soo muuqday maxkamad ku taala Koonfur magaalada Gaalkacyo isaga oo ku
eedeysnaa in uu sameeyay Sawir Gacameed uu ku sheegay in uu yahay Nabi Maxamed
NNKH, hasse ahaatee maxkamada ayaa markii danbe fasaxday iyaga oo sheegay in
uusan wax danbi ah laheyn.
Ilaa iyo hadda wax war ah kama
soo bixin maamul gobolleedka Galmudug oo la xiriira Qaraxyada iyo weerarrada
saakay ka dhacay Koonfurta Gaalkacyo iyo khasaaraha ka dhashay intaba.
C/raxmaan
Diini, Hiiraan Online
[email protected]
