Golaha Isbadal doonka Koonfur Galbeed oo sheegay in Mukhtaar Roobow yahay musharaxooda doorashada
Axad, November, 25,
2018 (HOL)- Musharixiin markii hore ku midoobay golaha Isbadal-doonka Koonfur
Galbeed ayaa kulan ay ku yeesheen magaalada Baydhabo goor dhaw oo maanta ah ku
dhawaaqay in ay u tanaasuleen islamarkaana musharaxoodu yahay doorashada soo
socta Mukhtaar Rooboow Cali Abuu-Masuur.
Kulankan oo ahaa mid
xasaasi ah ayeey golaha ku eedeeyeen dowladda Soomaaliya fara-galin ba’an oo ay
ku heyso hannaanka madaxweyne ee maamulka Koonfur Galbeed iyada oo leyska
dhaga-marinayo ayeey sida ay hadalka u dhigeen rabitaanka shacabka.
‘’Markii aan aragnay
fara-galinta qaawan oo ay dowladda federaalku ku heyso doorashada, markii aan
tixgalinay rabitaanka Shacabka deegaannada Koonfur Galbeed, markii aan ogaannay
baahida loo qabo in dadku iyaga soo xushaan hoggaankooda islamarkaana dhistaan
maamul hoosaadkooda, waxaan isla –garanay in Mukhtaar Rooboow uu noqdo
musharaxa tartanka doorashada uga qeybgalaya golaha isbadal –doonka Koonfur
Galbeed’’ ayaa lagu sheegay qoraaalka.
Tallaabada ay
qaadeen golaha ayaa xaqiijineysa in Mukhtaar Rooboow yahay musharax leh
taageero siyaasadeed islamarkaana la tartami doona musharaxiinta aan aan markii
horeba qeybta ka aheyn golaha, iyadoo isla maanta mar kale la guddoonsiiyay
Rooboow Shahaatadda musharaxnimada.
C/raxmaan Diini, Hiiraan
Online
[email protected]
