Axad, November, 25,
2018 (HOL)- Robert Mugabe madaxweynihii hore ee dalka Zimbabwe oo hadda 94 sano jir ah ayaa laga deyrinayaa
xaaladiisa caafimaad.
Waxaa la sheegay in
hadda lagu daweynayo muddo labo bilood ah isbitaal ku yaala dalka Singapore
sida uu meel fagaaro ah ka sheegay madaxweynaha dalkaasi Zimbabwe Emmerson Mnangagwa.
“Dabcan isagu hadda waa oday da’ ah, ma awoodo
in uu socdo laakiin wax walba oo uu na weydiisto waan siineynaa.”ayuu Mnangagwa
ugu sheegay boqolaal ka mid ah taageerayaashiisa magaalada Zvimba oo ah oo
`100km galbeed ka xigta caasimada Harare ahna halka uu ka soo jeedo Mugabe.
“Waan xanaaneyneynaa Aabihii aasaasay Zimbabwida
Xorta ah.”ayuu sii raaciyay Mnangagwa.
Mugabe ayaa la filayay in horaanta bishii hore ee
Oktobar uu ka soo laabto dalka Singapore hase yeeshee xaalad caafimaad awgii
ayaa loo baahday in uu sii joogo bil kale sida uu sheegay Mnangagwa.
Hase yeeshee waxaa la filayaa in dhamaadka bishan
November uu dib ugu soo laabto dalkiisa.
Bishan ayaa waxa ay ku beegan tahay sanadguuradii
koowaad markii Mugabe uu iska casilay xilka madaxtinimo kadib markii Milatarigu
uu farogelin ku sameeyay maamulka dalkaas.
Bishii July ee sanadkan ayaa doorasho ka dhacday
dalka Zimbabwe waxaa si dirqi ah ugu guuleystey Madaxweynaha 75jirka ah ee
haatan hogaanka haya Mnangagwa.
C/raxmaan Diini, Hiiraan
Online
[email protected]