Madaxweyne Biixi oo booqday jiida hore ee ciidamada Militariga Somaliland ee aagga Tuko raq
Sabti, November, 24, 2018 (HOL)- Madaxweynaha Somaliland
Muuse Biixi Cabdi ayaa maanta gaadhay jiida hore ee deegaanka Tuko raq ee
ciidamada Militariga Somaliland fadhiisinka u ah.
Madaxweyne Muuse Biixi Cabdi oo ay wehelinayaan
taliyaha ciidanka militariga Sareeye Gaas Nuux Ismaaciil Taani, taliyaha ciidanka
Booliska, Sarreeye Gaas Cabdilaahi Fadal Iimaan iyo maamulka gobolka Sool, ayaa
salaam ka qaatay ciidamada ku sugan deegaanka Tuko raq, waxaana warbixino ku
siiyey saraakiisha iyo saraakiil-ku-xigeennada talisyada kala duwan ee ciidanka
ku sugann Aaggaas.
“Aad baan madaxweyne kaaga mahadnaqayaa
sida wanaagsan ee aad ciidanka u taakulayso iyo sida aad markasta u doonayso in
wax loo qabto ciidanka.”ayuu yidhi taliyaha ciidanka Milirariga Gen:Nuux
Taani oo ku soo dhoweynayey madaxweynaha.
Sidoo kale, Wasiirka wasaaradda gaashaandhigga,
Mudane Ciise Axmed Yuusuf oo isna halkaaski ka hadlay ayaa yidhi “Madaxweyne
saaka maalin farxad leh bay noo tahay ragganina waa ragga aynnu ku fadhinno,
mudnaantooda iyo karaamayntoodana cidina kaaga warrami mayso, waase rag
aaminsan waxa ay meesha u joogaan, masuuliyadda saaran, marna waa cuqaal oo
haddii aanay dulqaad iyo karti muujin nabadu may jirteen, taasna waan ku
bogaadinayaa, shacabkana way kasbadeen.”
Madaxweyne Biixi ayaa isna sharaxay sharraxay
sida ay ciidamadu muhiimka ugu yihiin nolosha iyo sida ay shaqadoodu u tahay
midda ugu karaamada badan adduunka, waxana isaga oo arrimahaas ka hadlaya uu
yidhi, “Shaqada la isku wada raacsan yahay ee laga yaabo inaanay dheef badan
lahayn, laakiin karaamo iyo ixtiraam iyo duco loo hayo, halka ugu karaamada
badan ee ummadda oo dhammi isku raacsan tahay waa ciidamada qaranka, waayo
ciidamadu waa astaantii qaranka.”
Waxaanu intaas ku daray “Waxad tihiin ciidan
nabad-doon ah oo aan cidna ku duulaynin ee dalkiisa uun ilaashanaya oo wixii
kusoo xad-gudba iyo wixii fadqalala ka wada qabanaya, waxaynnu nahay ciidan aan
cidna weerar ku ahayn oo intii uu jireyba nabad soo waday oo dadkana kala
ilaalinaya, dalkana ilaalinaya.”
Sidoo kale madaxweynuhu waxa uu la kulmay
odayaasha deegaanka Tukaraq oo ay wada qaateen kulan is xogwaraysi ah.
Dhinaca kale,waxa si diiran loogu soo dhoweeyey
madaxweynaha iyo weftigiisa magaalada Laascaanood iyo deegaanda ku xeeran,
waxaana halkaasi lagu gudoonsiiyey Fardo, isla markaana uu isaguan ka gudoomay.
Barkhad-ladiif
M. Cumar, Hiiraan Online
[email protected]
Hargeysa,
Somaliland.