Mareykanka oo horaanta bisha December ee sanadkan safaaradiisa u raraya Soomaaliya
Jimco, November, 23, 2018 (HOL) –Safiirka
cusub ee Mareykanka uu u magacaabay Soomaaliya Donald Yamamoto ayaa sheegay in
uu dib ugu guurayo Soomaaliya ilaa horaanta bisha December ee sanadkan sida uu
ku sheegay wareysi uu siiyay laanta Afka Soomaaliga ee VOA.
Wuxuu sheegay in arinta aysan
aheyn oo kaliya Muqdisho laakiin guud ahaan ay ka howlgali doonaan sida uu
hadalka u dhigay Soomaaliya oo idil isaga oo yiri Soomaaliya ma’aha Muqdisho oo
kaliya.
‘’Waxaan ka howlgali doonnaa Soomaaliya
oo idil Waqooyi ilaa Koonfur, Bari iyo ilaa Galbeed, Soomaaliya ma’aha oo
kaliya Muqdisho’’ayuu yiri safiirka Mareykanka ee Soomaaliya.
Yamamoto oo dhinacyo badan ka
hadlay ayaa sheegay in uu hadda rajo badan uu ka qabo in Soomaaliya ay dib u soo
kabaneyso, inkastoo sida uu hadalka u dhigay dhamin yihiin arrimo waaweyn oo u
baahan in wax laga qabto, haddana dhinac kale waxaa uu sheegay in hormar la
sameynayo.
Mar uu soo hadal qaaday
isbaheysiga wadamada Geeska Africa ayuu sheegay in ay muhiim u tahay arintan
guud ahaan marka la eego wadamada Geeska, gaar ahaan Soomaaliya, Itoobiya,
Jabuuti iyo Eritrea oo dano badan isaga xiran yihiin.
‘’Waxa aan hadda arko waa is
dhaxgal Ganacsi iyo waliba hormaro leyska kaashanayo, Soomaaliya saddexdan
wadan xudun ayeey u tahay, waxaa jira dano badan oo dhinac-yadan oo dhan iska
leeyihiin, sidaa daraadeed ma’ ogolaaneyno in la carqaladeeyo isku soo
dhawaanshaha wadamada Geeska Africa’’ ayuu yiri Safiir Yamamoto.
Safiirka ayaa dhinaca kale
sheegay in uu qorsheynayo safarro uu ku kala bixiyo xarumaha dowlad
gobolleedyada dalka iyo guud ahaanba gobollada Soomaaliya, socaaalkaa oo muhiim u
ah ayuu yiri in wax laga qabto baahiyaha bulshada.
“Waxaan booqan doonaa dhammaan gobolada iyo maamul goboleedyada sababtoo ah
waxaan rabnaa in si firfircoon uga shaqeeyno caafimaadka,waxbarashada iyo
weliba abuurista fursado shaqo oo bulshada u baahan tahay.”ayuu yiri.
Yamamoto ayaa sheegay in ugu
danbeyntii in Al-shabaab laga adkaan karo marka la helo maamul adag oo
shaqeynaya, mana aha ayuu yiri wax ku kooban Soomaaliya dhibaatada kooxaha
xagjirka ah ee sidoo kale waxaa jira dalal kale oo dunida ka tirsan oo ay ku
hayaan dhibaato dhinac amniga ah.
Safiirka ayaa dhawaan
warqadihiisa aqoonsiga u gudbiyay madaxweynaha Soomaaliya Maxamed Cabdullaahi
Farmaajo oo kula kulmay xarunta Xalane ee magaalada Muqdisho.
C/raxmaan Diini, Hiiraan
Online
[email protected]
