Jimco, November, 23, 2018 (HOL) –
Madaxweyne Muuse
Biixi oo ku jira safarkii uu gobolada bariga ku marayey ayaa maanta gaadhay
magaalada Caynabo ee gobolka Sool, waxaanu fariin u direy maamulka
Puntland iyo madaxweynaha Soomaaliya.
Madaxweyne Biixi ayaa waxba kama jiraan ku
tilmaamay eedaymo uga yimid golaha wasiirrada maamulka Puntland, kuwaas
oo safarka madaxweynaha ku tilmaamay mid fidmo abuur ah.
“Dadka reer Sool dad la cabudhin karo ma
aha, waa dhashii daraawiishta oo cidina xoog iyo hanjabaad ulama timaaddo,
walaaltinimo iyo maxaynnu yeelnaa baa loola tagaa, waxana aannu leenahay
Soomaali maanta uma baahna cabudhin, xoog iyo dagaal, waliba Somaliland iyo
dawlad-goboleedka Puntland waligood khilaaf hore iyo colaad hore kama
dhexaynin, waana isku xaalad oo labaduba xaalado abaareed oo dhaqaale baa
haysta,” ayuu yidhi Biixi oo ka jawaabayey hadalo ka soo yeedhay Puntland oo
sheegay in shacabka Sool Somaliland qasab ku haysato.
Waxaanu intaas ku daray “Dadka Puntland
annaga waxba nama dhex yaallaan, dadka reer Puntland-na waxannu u naqaannaa dad
gob ah, talo qabeen ah oo aan dadka ku ciir-ciirin, qoladan dhallinyarada ah ee
imika xukunka haysana waxan leeyahay sidii awoowayaashood iyo boqorradu u
dhaqmi jireen ha u dhaqmaan oo miyirka ha soo celiyaan, cidda aynnu is haynno
ee dhibaato ka taagan tahayna waa maamulka Muqdisho.”
Madaxweynuhu wuxuu sheegay in muranka ka dhexeeya
iyaga iyo Puntland tahay mid xududeed, waxaanu sheegay inay Somailand aaminsan
tahay xuduudii gumaystuhu sameeyey ee afrika ku dhisan tahay in la isku
ixtiraamo.
madaxweynuhu wuxuu eedo usoo jeediyey madaxda
sare ee Soomaaliya, waxaanu yidhi “Ninka Soomaalida magaalo magaalo ula dagaallamaya
ayaannu leenahay Ilaahayow sharkiisa idinka ururi oo aynnu u baahannahay
inaynnu u caqli celinno, haddii loo caqli celin waayona aynnu iska qabannee,
annagu Puntland iyo Garoowe uma soconno, mana qaxinayno, mana rabo inay
dhibaato gaadho,”
“Somaliland way ka madax bannaan tahay
Soomaaliya, waxana ay ku go’day niyaddeeda, haddii aynnu kala madax
bannaannahayna colaad, xumaan, weerar iyo necbaansho midna naguma jiro, dad
ciil qabona ma nihin oo wixii dhacay ciil maalin walba ka taagan, laakiin waxannu
ka yaabnay kuwii hore wixii ay sameeyaan kuwo ka waalan oo Xamar Fadhiya imika,
Soomaali iyo cid walba nabad baannu la doonaynaa, ninkii nabadda diida ee loo
taag waayona waannu Edbinaynaa,” ayuu yidhi madaxweyne Muuse Biixi Cabdi.
Barkhad-ladiif
M. Cumar, Hiiraan Online
[email protected]
Hargeysa,
Somaliland.