Jimco, November, 23,
2018 (HOL) – Ugu yaraan 5 weerar oo cirka ayuu Mareykanku ka geystay Saddexdii maalmood
ee la soo dhaafay deegaanno ka tirsan gobollada dhexe Soomaaliya, kuwaa oo lagu
bartilmaameedsaday dagaalyahanno ka tirsan Al-shabaab.
Wararkii ugu
danbeeyay ee sidoo kale ka imanaya gobolka Mudug ayaa sheegaya in ay dhaceen
duqeymo kale oo dheeraad ah sida ay laga soo xigtay dadka deegaanka.
Labo weerar oo ka
mid ah howlgalkan waxaa ay qaadeen Isniin la soo dhaafay oo ay taariikhdu ku
beegneyd 19kii bishan, weerarka kale ayaa dhacay 20kii bishan, halka Labo
weerar kale loo adeegsaday diyaaradaha dagaalka dhaceen 21kii bishan Arbacadii
aynu soo dhaafnay.
Dhamaan weerarradan
ayaa ka dhacay deegaanno hoostaga degmada Xarardheere oo ay xoog badan yihiin
dagaalamayaasha Al;-shabaab, waxaana lagu dilay qiyaastii in ka badan 50
dagaalyahan.
Gaar ahaan
bartilmaameedka Mareykanka ayaa ahaa saldhigyada iyo goobaha ay hubka ku
keydsadaan Al-shabaab sida ay laga soo xigtay taliska ciidamada Africom oo
qoraal ay soo saareen ku sheegay in dhamaan weerarradan lagu guuleystay.
Wali dowladda
Soomaaliya kama aysan soo saarin war faah faahsan duqeymaha is daba jooga ah ee
maalmihii ugu danbeeyay Mareykanku ka sameynayeen deegaanno ka tirsan bartamaha
Soomaaliya gaar ahaan gobolka Mudug.
Sidoo kale waxaa
duqeymahan iyagu-na dhankooda ka hadal Al-shabaab oo la sheegay in looga dilay
tiro badan oo ka mid ahaa xoogaggooda ka dagaalama bartamaha Soomaaliya.
C/raxmaan Diini, Hiiraan
Online
[email protected]