Jimco, November, 23,
2018 (HOL) – Saraakiisha maamulka
gobolka Shabeellaha Hoose ee dowladda Soomaaliya ayaa sheegay in howlgal
ciidamada dowladda ay ka sameeyeen deegaanka Jilib-Marka ku dileen 7 xubnood oo
ka tirsanaa dagaalyahannada Al-shabaab.
Maxamed Ibraahim Barre
oo ah guddoomiyaha gobolka Shabeellaha Hoose ayaa sheegay ciidamada dowladda
howlgal ay ka sameeyeen deegaanno ka tirsan gobolka ku dileen 7 xubnood oo ka
tirsan Al-shabaab tiro kale oo intaa ka bandanna lagu dhaawacay.
‘Ciidamada dowladda
ayaa howlgal qorsheysan oo ay ka fuliyeen deegaan Jilib –Marka ee gobolka
Shabeellaha hoose, waxaa ay ku dileen 7 dagaalyahan oo ka tirsan Al-shabaab,
tiro kale oo intaa ka badanna waxaa ay ku dhaawaceen, howlgalku-na wali waa uu
socdaa’’ ayuu yiri guddoomiyaha.
Laakiin dhinaca kale
Al-shabaab ayaa warbaahinta u sheegay in dagaal ka dhacay gobolka Shabeellaha
hoose oo ay la galeen ciidamada dowladda ku dileen Afar Askari dhinaca kalana
ku furteen hub iyo saanad ciidan.
Sidoo kale waxaa ay
sheegteen Al-shabaab in 12 askari oo ka tirsanaa ciidamada dowladda ku dileen
Qarax miino oo ka dhacay degmada
Wanla-weyn ee gobolka Shabeellaha Hoose.
Howlgalka ciidamada
dowladda ayaa ku soo beegmay xili diyaaradaha Mareykanka duqeyn ka fuliyeen gobollada
dhexe ku dileen 50 dagaalyahan oo Al-shabaab ka tirsan.
C/raxmaan Diini, Hiiraan
Online
[email protected]