Mareykanka oo sheegay in uu duqeyn ku dilay 37 dagaalyahan oo ka tirsan Al-shabaab
Talaado, November, 20, 2018 (HOL) –Taliska
Mareykanka ee Africom ayaa sheegay in iyaga oo kaashanaya ciidamada xoogga dalka
Soomaaliyeed duqeyn ay ka fuliyeen deegaanno hoostaga degmada Xarardheere ee
gobolka Mudug ku dileen 37 dagaalyahan oo ka tirsanaa Ururka Al-shabaab.
Duqeynta oo labo jeer kala dhacday ayeey
Mareykanku ka fuliyeen deegaanno hoostaga degmada Xarardheere, iyaga oo duqeyn
hore ku dilay 27 dagaalyahan oo ka tirsanaa Al-shabaab, halka weerar kale oo
cirka ah ku dileen 10 dagaal yahano kale.
Sheegashada taliska Mareykanka ayaa imaneysa iyadoo shalay weerarro
cirka ah laga soo sheegay in ay ka dheceen deegaanno hoos taga degmada
Xaradheere.
Ilaa hadda ma jiraan ilo madaxbanaan oo sheegaya khasaare ka duwan kan
Maraykanku sheegay, sidoo kale Al-shabaab-na dhinacooda kama aysan hadal warka
ku saabsan duqeymahan.
Deegaannada ay duqayntu ka dhacday ayaa la aaminsan yahay in ay xoog ku
leeyihiin Al Shabaab.
Ma’aha markii ugu horeysay ee Mareykanku weeraro cirka ah ka fuliyaan
deegaanno ka tirsan gobollada dalka Soomaaliya haba ugu badnaadaan kuwo
Koonfurta dhaca, gaar ahaan Jubbooyinka
iyo Gedo.
C/raxmaan Diini, Hiiraan
Online
[email protected]
