Doodda mas’uuliyiinta dowladda iyo siyaasiyiinta mucaaradka ah oo meel sare gaartay
Jimco, November, 02, 2018 (HOL)- Tan iyo wixii ka danbeeyay khudbadii
madaxweynaha dowladda Soomaaliya uu ka jeediyay magaalada Jubba oo si aan horay
looga baran uu ugu weeraray siyaasiyiinta mucaaradka ku ah dowladda uu
madaxweynaha ka yahay iyo madaxda dowlad gobolleedyada iyo khudbadii ugu
danbeysay ee Duqa Muqdisho waxaa sii xoogeysanayay xifaaltanka labada dhinac.
Saacadihii ugu danbeeyay waxaa baraha bulshadu ku
wada xiriirto iyo warbaahinta intaba qabsaday jawaabaha ay arintan ka
bixinayaan siyaasiyiinta ku kacsan dowladda oo qaarkood ku tilmaamay fariimihii
ugu danbeeyay ee dhinaca dowladda kuwo u eg daandaansi colaadeed.
Cabdiraxmaan Cabdishakuur Warsame oo ah
hoggaamiyaha xisbiga Wadajir, dhinaca kalana ka mid ah siyaasiyiinta dowladda
ka soo horjeeda kuwooda ugu magac weyn, ayaa sheegay in ay isku qaban-weyday
gogosha uu madaxweynuhu u fidiyay maamul gobolleeed-yada iyo khudbadiisii ugu
danbeysay ee uu u jeediyay Jaaliyada Soomaaliyeed ee magaalada Jubba ee dalka Koonfurta Sudan.
Isaga oo la hadlayay BBC ayuu sheegay in hadalka
madaxweynaha uu u muuqday daandaasi dagaal iyo jees jees, dhinaca kalana
marnaba u adeegeynin in leysku soo dhawaado oo dhameeyo khilaafka taagan.
“Khudbad daan daansi iyo dagaal uu ka muuqdo ,
Madaxweynaha asigaa dhowr maalin ka hor sheegay inuu gogol u fidiyay madaxda
maamul goboleedyad ooo ku baaqayo in shir la isugu yimaado wixii tabasho ah uu
garawsan yahay, sida dad badan tuhunsan yahay martiqaadkiisa iyo fariinta
xalay uu dirayay wey kala fog yihiin”ayuu yiri C/raxmaan C/shakuur.
Wuxuu sheegay Cabdiraxmaan Cabdishakuur in ay ka
madaxda dowlad gobolleed-yada ka mid yihiin xoogagga siyaasadeed ee dalka isaga
oo yiri’’ Waxaa rabaa inaan xusuusiyo Madaxweynaha kulankii ugu dambeeyay ee
Brussels ka dhacay Beesha caalamka ayaa isugu yeertay isaga iyo Madaxda Maamul
goboleedyad,a wax laga hadlayo waa arrimo Soomaaliya ku saabsan, looma yeerin
Madaxweynaha keligiis, ayagana waa loo yeeray wuu ogyahay Madaxweynaha waaqica
horyaala in dalkaan ku jiro marxalad dib u heshiisiin, marka aniga hadalka
Madaxweynaha ilama ahan mid nabad iyo dib u heshiisiin oo isu soo dhowaansho
raadinaya”ayuu yiri”ayuu yiri Siyaasiga C/raxmaan C/shakuur.
Xaaladda ayaase ka sii dartay kaddib markii
saacadihii ugu danbeeyay baraha bulshada ay dood adag isku weydaar-sadeen
guddoomiyaha gobolka Banaadir Eng Cabdiraxmaan Cumar Cismaan Yariisoow iyo xildhibaan Axmed Macalin Fiqi oo ka mid ah
siyaasiyiinta ka soo horjeeda dowladda, kaddib markii uu xildhibaanku qoosaday hadal uu jeediyay guddoomiyaha gobolka
Banaadir.
Guddoomiye Yariisoow ayaa ku tilmaamay
siyaasiyiinta mucaaradsan dowladda kuwo garab siinaya kooxaha Argagixisada, loona
baahneyn sida uu hadalka u dhigay siyaasi qaswade ah.
Fiqi ayaa sheegay in gobolka Banaadir sida uu
hadalka u dhigay uusan u baaheyn qof Guuldwadeeya, laakiin u baahan yahay qof ka
shaqeeya nadaafada iyo in uu wax ka qabto jidadka baliyada biyuhu ka sameys-teen.
‘’ Guddoomiye Yariisow waa hadlay laakin
wadooyinka mugdiga noqday, balliyada biyaha Muqdisho roobabku ku reebeen iyo
qashinka meel kasta yaalla ayaa shaqadoodu u taallaa iyo inuu wax ka yiraahdo,
laakin mucaaradka ka hadalkiisa madaxweynaha ayaa Koofurta Sudan fariin uga Soo
diray oo ku filan. Mise dhaqanka Guulwadaynta waa lagu qasban yahay.’’ Waa qeyb
ka mid ah erayadii uu xildhibaanku ku soo qoray boggiisa Facebook –ga.
Arrinka ayaa hadda u muuqda mid faraha ka sii
baxaya waxaana cirka isku shareertay doodda labada dhinac ay isku marinayaan
warbaahinta iyo baraha bulshada.
Madaxda dowlad gobolleedyada ayaa hadda intooda
badan waqtigoodu gabaabsi iska sii yahay, waxaana muuqata dagaalkoodii dowladda
u wareejiyeen olole doorasho iyo sidii ay isaga difaaci lahaayeen wax ay ugu
yeereen fara-galin dowladda dhexe ay ku heyso doorashooyinka ku soo foolka leh
deegaannadooda.
Si kastaba ha ahaatee, dadka sida weyn ugu dhuundaloola
arrimaha siyaasada ayaa qaba in madaxda ugu sareysa dalka markan
doonayaan in ay shacabka la wadaagaan siraha hoose ee ku dhax qarsoon khilaafka
labada dhinac iyo halka ay arrimuhu iska qaban la’yihiin, waxaana taa laga
garan karaa khudbadii ugu danbey-say ee madaxweynaha Farmaajo oo sheegay in
madaxda dowlad gobolleed-yada doonayaan in ay qataan door aan aheyn kii loo
idmaday.
C/raxmaan Diini, Hiiraan
Online
[email protected]