Xildhibaanno beeniyay in dowladda fara-galin ku heyso doorashada Koonfur Galbeed
Jimco, November, 02, 2018 (HOL)- Mudanayaal ka
tirsan Baarlamaanka Soomaaliya ayaa ka soo horjeestay wararka sheegaya in
dowladda dhexe faragalin ku heyso doorashada madaxtinimada maamulka Koonfur
Galbeed.
Xildhibaan, Cabdullaahi Abshiroow, oo ka mid ah
Golaha Shacabka ayaa sheegay in aysan jirin wax faro galin ah oo ay dowladda
dhexe ku heyso doorashada Madaxweynaha ee Koonfur Galbeed, taas baddalkeedana dowlad
Goboleedyadu ay u madax bannaan yihiin arrimaha doorashooyinka.
“Doorashooyinka Koonfur Galbeed waxaan maqlay in
la leeyahay waxaa faro galin ku haya Xukuumadda taas waxba kama jiraan aniga
ayaa tagay Magaaladda Baydhabo oo degaankeyga ah mana ku soo arkin waxa
lasheegayo runtii maanta wax faro galin majirto balse badaalkeeda waxa socda
horumar wanaagsan oo meel kasta laga wado” sidaas waxaa sheegay Xildhibaan
Cabdullaahi Abshirow oo la hadlayay warbaahinta dowladda.
Cabdullaahi Abshirow ayaa sheegay in shacabka
Koofur Galbeed ay aad u taageersan yihiin dowladda Soomaaliya, kadib markii dowladda
ay ku guuleysatay in Maleeshiyaadka Al-shabaab ka saarto Waddada isku xirta
Muqdisho iyo Marka oo ay muddo badan dadka shacabka ah Al-Shabaab ku dhibaateyn
jireen,
Wuxuu sidoo xusay in ciidamada xoogga dalka uu ku
guuleysteen inay kala qaadaan malleeshiyo beeleed muddo isku hor fadhiyey duleedka
magaaladda Marka ee Gobolka Shabeellaha hoose, taasoo uu ku tilmaamay guul ay
horseedday dowladda dhexe.
“Shacaabka Koonfur Galbeed waxaa ay ii soo
dhibeen Fariin ay ugu mahadcelinayaan Madaxeweyne Farmaajo iyo Ra’iisal wasaare
Kheyre iyo dhamaan madaxda Dowladda Soomaaliya aad ayey u soo dhaweeyeen
howlgalkii lagu furay waddada isku xirta Muqdisho iyo Marka oo aan muddo badan
lamarin, sidoo kale waxaa ay ka mahad celinayaan in la kala qaaday Malleeshiyo
Beeleedkii Marka isku haystay sidoo kalena heshiis arrintaas laga gaaray”.ayuu
yiri Xildhibaanka.
Sidoo kale waxaa beeniyay in dowladda faragalin ku heyso doorashada Koonfur Galbeed xildhibaan Idiris Aadan Dhakhtar oo sheegay in xildhibaannada eedeynta u soo jeediyay dowladda loo baahan yahay in maxkamad la horkeenno.
Maamulka Koonfur Galbeed ayaa ku eedeeyay
dowladda dhexe in ay faragalin ku heyso doorashada 17ka bishan lagu wado in ay
ka dhacdo Koonfur Galbeed.
C/raxmaan Diini, Hiiraan
Online
[email protected]
