Jimco, November, 02, 2018 (HOL)- Wali waxaa
soconaya doodda ku saabsan halka uu ku danbeeyay meydka Wariye Jamal Khashoggi oo lagu
dhax dilay Qunsuliyada Sacuudiga ee magaalada Istanbul ee dalka Turkiga.
Dowladda Turkiga ayaa sheegtay in cadeymo kimikal
ah oo laga helay beerta qunsulka ay tilmaamayaan in ay suurtogal tahay in
halkaa ay tahay meesha medka Khashoggi lagu jarjaray kadibna lagu baabi’iyay
kimikada aashitada ama aysidka.
Yasin Aktay oo ah la taliyaha Madaxweynaha
Turkiga Erdogan ayaa u sheegay wargeyska Hurriyet in dadkii diley Khashoggi ay
ku baabi’iyeen meydkiisa kimikada aashitada si aan dib dambe loo ogaan halka
lagu diley.
“Wararka ugu dambeeya ee la xiriira dilka
Khashoggi sababta ay u jarjareen meydkiisa waxa ay ahayd si ay u fududaato in
kimikadaas dhaqso loogu baabi’iyo.”ayuu sii raaciyay warkiisa Aktay oo la
hadlay Washington Post
Sida lagu daabacay wargeys ka soo baxa dalka
Turkiga baarayaasha Turkiga ayaa loo diiday inay baaraan biyaha ceel ku dhex
yaal guriga qunsulka Boqortoyada Sacudi Carabiya ee magaalada Istanbul.
Afhayeen u hadlay Wasaarada Arrimaha Dibbada
Maraykanka Robert Palladino ayaa ku baaqay in la keeno meydka Khashoggi si
qoyskiisa ay u aastaan.
Hatice Cengiz oo ah gabadhii uu doonayay inuu
guursado Khashoggi kuna sugaysay afaafka hore ee qunsuliyada Sacudi Carabiya
ayaa sheegtay in waxa lagu sameeyay meydka Khashoggi ay tahay wax fool xun oo
aan naxariis lahayn.
C/raxmaan Diini, Hiiraan
Online
[email protected]
