Jimco, November, 02, 2018 (HOL) –
Guddoomiyaha maamulka gobolka Banaadir ahna duqa Muqdisho Eng Cabdiraxmaan
Cumar Cismaan Yariisoow ayaa weerar ku qaaday siyaasiyiinta mucaaradka ku ah
dowladda, isaga oo sheegay in aan laga aqbali doonin sida uu hadalka u dhigtay
in ay xagxagtaan dowladda dhexe.
Wuxuu sheegay in
siyaasiga mucaaradka ah aan looga baahneyn in uu noqdo mid kaliya buunbuuniya
sida uu hadalka u dhigay amaan darada dalka ka jirta, laakiin taa badalkeeda
looga baahan yahay in dhaliishooda noqoto mid lagu toosiyo dowladda oo wax
dhisaneysa.
“Siyaasigii khas wade ah hala soo safto kooxda
argagixisada ah ma aqbali doono in dhexdeena uu khaska ka wado oo uu dowladda
xagxagto, ha noqon mucaarad kaliya ka hadla dhanka xun iyo amni daraddo in ay
dalka ka jirto” ayuu sheegay Duqa Muqdisho Eng Yariisoow.
Hadalka Duqa Muqdisho ayaa imanaya xili maalin ka
hor madaxweynaha dowladda Soomaaliya Maxamed Cabdullaahi Farmaajo oo khudbad u
jeedinayay jaaliyada Soomaaliyeed ee ku dhaqan magaalada Jubba ee dalka Koonfur
Sudan ku tilmaamay siyaasiyiinta ka soo horjeeda dowladda iyo madaxda dowlad
gobolleedyada kuwo xadkoodii tallaabay kana shaqeynaya wax aan aheyn sida uu
hadalka u dhigay howlihii loo idmaday.
C/raxmaan Diini, Hiiraan
Online
[email protected]