Mas’uuliyiin ka qeyb-gashay qalin-jabinta 577 Ardey oo ka baxday Jaamacadda Banaadir
Khamiis, November, 15, 2018
(HOL) – Xaflad ballaaran oo shahaadooyin lagu gudoonsiinayey boqolaal arday oo
ka qelin jebisay Sagaal ka mid ah 11-ka kuliyadood ee ay ka kooban tahay Jaamacadda
Banaadir ayaa maanta lagu qabtay magaalada Muqdisho.
Munaasabadan oo si heer sare
ah loo soo qaban-qaabiyey ayaa waxaa ka qeyb galay masuuliyiin ka tirsan
Maamulka gobolka Banaadir, labada gole ee baarlamanka Somalia, qeybaha kala
duwan bulshada, fanaaniin, waalidiin, arday, wakiilo ka socday heyaddo kala
duwan iyo marti sharaf kale.
Intii ay munaasabadan socotay
ayaa koox ka tirsan fanaaniinta Soomaaliyeed waxay ku soo bandhigeen suugaan
kala duwan oo isugu jirtay heeso guubaabo ah iyo riwaayad ka turjumeysay
qiimaha waxbarashada.
Gudoomiyaha Jaamacada Banaadir
Dr. C/risaaq Axmed Dalmar oo ka mid ahaa masuuliyiintii ka hadashay
munaasabadan ayaa sheegay in maanta ay u tahay maalin faraxadeed uuna u
hambalyeynayo ardayda qelin jebisay isagoo dhinaca kale ku dheeraaday asaaska
jaamacada marxaladihii ay soo martay, horumarka ay ku talaabsatay iyo
qorsheyaasha ay higeysaneyso mustaqbalka.
“Maanta waa maalin xusuus
mudan, waxaana naga qelin jebineysa 577 aqoonyahan, 238 ka mid ay waa
dhaqaatiir waa guul taariikhi ah oo u soo hoyatay bahda Caafimaadka
Soomaliyeed, waxaa kaloo maanta naga qelin jebiyay 111 ka baxay kuliyadda
dhaqaalaha iyo Maamulka, 80 kuliyadda Injineeriya, kuliyada shareecada iyo
qanuunka waxaa ka aflaxay 15 aqoonyahan, Kulliyadda Beeraha 36 aqonyahan,
Kuliyadda xanaanada xoolaha 31 aqoonyahan, kuliyadda waxbarashada 8
aqoonyaahan, kuliyadda kombiyuutar Sayniska 16 aqoonyahan, kuliyadda culuunta
Caafimaadka 42 aqoonyahan oo isugu jira umulisooyin iyo kalkaaliyeyaal iyo
kuliyada beeraha oo ay ka soo baxeen 36 aqoonyahan” ayuu yiri gudoomiye Dalmar
oo mustaqbal wanaagsan u rajeeyey ardayda qelin jebisay.
Guddoomiyaha guddiga adeega
bulshada ee aqalka sare ee Somalia Senator Prof. Cismaan Maxamuud Dufle ayaa
isna sheegay in 238 dhaqtar ee ka qelin jebiyay kuliyadda dhaqtarnimada ay
yihiin kuwii ugu badnaa abid ee isku mar ka qelin jebiya Jaamacad Soomaaliyeed
taasina ay astaan u tahay horumarka ay Jaamacadda Benadir ku talaabsatay mudada
ay jirtay wuxuuna hambalyo u diray ardayda qelin jebisay isagoo u mahad celiyey
madaxda xafladan kala soo qeyb gashay.
Gudoomiyaha gobolka Banaadir
ahna duqa Muqdisho Eng. C/raxmaan Cumar Cismaan (Yariisow) oo ugu dambeyn
khudbad ka jeediyey munaasabadaas ayaa bogaadin iyo hambalyo u diray ardayda qelin
jebisay oo uu sheegay in looga fadhiyo ka qeyb qaadasha dib u dhiska dalkooda.
“Dal kasta horumarkiisa waxaa
horseed u ah dedaalka ay muujiyaan aqoonyahanadiisa, wadamada horumaraya ee aad
arkeysaan aqoon iyo cilmi baaris ayey ku gaareen, waxaana la idinka fadhiyaa
inaad sidaas la mid dadkiina iyo dalkiina u horseedaan, Soomaaliya oo hadda
burburka ka soo kabaneysana idinka iyo kuwa idinla mid ah ayey u baahan tahay”
ayuu yiri gudoomiye Yariisow oo balan-qaaday in maamulkiisu uu gacan ka
geysanayo sidii shaqo loogu abuuri lahaa dhalinyarada dhameysatay jaamacadaha
dalka, isagoo dhinaca kale u mahad celiyey Maamulka iyo macalimiinta Jaamacadda
Benadir oo ku soo dedaalay ardayda aflaxday.
Intii munaasabadan ay socotay
ayaa waxaa Hadalo isugu jiray hambalyo, guubaabo iyo dardaaran ka jeediyey
Masuuliyiin ay ka mid ahaayeen Gudoomiye ku-xigeenka dhinaca Maamulka iyo
Maaliyada ee Jaamacada Banaadir C/raxmaan Xasan Cumar, Hormuudka kuliyadda
Caafimaadka ee Jaamacadda Banaadir Dr. Max’ed Max’uud Biday, xildhibaan Cali
Balcad oo ka tirsan aqalka hoose ee Baarlamanka Somalia horeyna u soo noqday
agaasimaha Madaxtooyada iyo xubno kale.
Guddoomiyhaa gobolka Banaadir
ayaa ugu daneyntii Eng Yariisow iyo
madaxdii kale ee munaasabadan goob jooga ka ahaa waxay shahaadooyin
gudoonsiiyeen ardaydii ka qelin jebisay kuliyadaha Jaamacadda Banaadir,
waalidiin iyo shaqsiyaad kale, waxaana xafladaas ay ku soo dhamaatay jawi aad u
farxad badan.
C/raxmaan Diini, Hiiraan
Online
[email protected]