Axad, May, 06, 2018 (HOL) – Koox wariyayaal ah oo
isugu jira warbaahinta madaxa-bannaan iyo tan dowladda Soomaaliya ayaa safar
shaqo ku maraya dalka China, kaddib martiqaad rasmi ah oo ay ka heleen
wasaaradda arrimaha dibeda dalka Shiinaha.
Ujeedada safarkan ayaa ku qotonta sidii labada
bulsho ay xogaha isugu gudbin lahaayeen iyadoo dhinaca kale sare loo qaadayo xiriirka
warbaahinneed ee labada dal.
Wariyayaashan ayaa ka kala socda warbaahinta
dowladda sida wakaalada Wararka Soomaaliyeed ee SONNA, Hiiraan Online, SBC,
Universal TV, Goob joog iyo Tv-ga laga leeyahay dalka Shiinaha ee CCTV.
Chen Tao oo ah u qeybsanaha wasaaradda arrimaha
dibeda Shiinaha dhinaca Warfaafinta ayaa sheegay in booqashadan noqon karto mid
soo jiidata Idhaha shacabka labada dowladood, islamarkaana daaha ka rogi
doonta taariikhda qarsoon ee soo jireenka ah ee ka dhaxeeya labada dal.
Wuxuu kaloo sheegay in ay siweyn u daneynayaa
xiriir dhaw oo dhaxmara warbaahinta labada dowladood, iyadoo leys dhaafsanayo
xogta iyo wararka la xiriira arrimaha bulshada iyo siyaasada, dhinaca kalana
dowladda Shiinaha ka caawin doonto warbaahinta Soomaaliya dhinacyada
tababarada.
Agaasimaha guud ee Wasaaradda Warfaafinta
Soomaaliya Cabdiraxmaan Yuusuf Alcadalla oo hogaaminaya kooxdan wariyayaasha ah
ayaa sheegay safarkani yahay qorshe cusub oo la doonayo in lagu xoojiyo dhinacyada
saxaafadda, dhaqanka iyo xiriirka ka dhaxeeya labada dal iyadoo loo sii mari
doono labada bulsho ee Soomaaliya iyo Shiinaha.
Ku-xigeenka agaasimaha guud ee wasaaradda
arrimaha dibeda waaxda Africa u qaabilsan Hu Zhang Liang ayaa sheegay in
Soomaaliya la leeyihiin xiriir aan dano siyaasadeed laga laheyn, isaga oo intaa
ku daray in dowladda Shiinaha ka warqabto in ay jiraan dowladdo kale oo
fara-galin ku haya Soomaaliya.
Booqashada kooxdan wariyayaasha ah ayuu ku
tilmaamay Hu Zhang mid baal cusub u firi doonto iska warqabka labada dowladdood
oo masaafo ahaa aad u kala fog maadaama ayuu yiri warbaahintu tahay aalad xoog
badan loo adeegsan karo isku soo dhawaashiyaha xogta dowladdaha.
Magaalada Beijing oo ay ku nool yihiin dadka kor u sii dhaafaya 20 milyan oo ruux waa magaalo degan oo aan
buuq laheyn, qof kastana si gaar ah ugu foogan yahay howl-maalmeedkiisa shaqo.
C/raxmaan Diini,
Hiiraan Online
[email protected]
