Maxaa looga hadlayaa shirka Baydhabo uga socda madaxweynayaasha dowlad gobolleedyada
Isniin, May. 14, 2018 (HOL) – Waxaa maanta
magaalada Baydhaba ee xarunta dowlad goboleedka Koonfur Galbeed ka furmay
shirka golaha iskaashiga ee dowlad goboleedyad Soomaaliya, kuwaasi oo halkaasi
gaaray shalay, sheegayna inay ka arrinsanayaan arrimaha khuseeya maamuladooda.
Shirkan oo uu marti geliyay madaxweynaha Koonfur Galbeed, Shariif Xassan
Sheekh Aadan ayaa madaxda dowlad goboleedyada waxaa ay sheegeen in shirkan
looga arrinsasanayo arrimo ay kamid yihiin amniga iyo sidii ururka Alshabaab
looga xoreyn lahaa deegaanada ay heystaan.
Arrimaha amniga oo ay ka qeybgalayaasha maanka ku hayaan ayaa waxaa jiray
shir dhawaan lagu qabtay Belgium-ka, halkaas oo uu ka qeybgalay Ra'isulwasaare
Xassan Cali Kheyre, balse madaxweynaha Jubbaland Axmed Maxamed Islaam oo
dhawaan hadlay ayaa sheegay in dowlad goboleedyada aanan shirkaas lagu
martiqaadin.
Madaxda ayaa waxaa kale oo ay intaa ku dareen in sidoo kale ay ka
arrinsanayaan qeybsiga kheyraadka dalka iyo in ula-jeedada ugu weyn ee laga
leeyahay shirkan ay tahay sidii wax iyaga ay isku waafaqsanyihiin ay ula
hortagi lahaayeen dowladda federaalka, sida uu kusoo waramayo wariyaha BBC-da.
Furitaanka shirka ayaa madaxda waxaa kale oo ay xuseen in doorashooyinka la
filayo in Soomaaliya ay ka dhacaan sannadka 2021-ka ay qeyb ka yihiin ajendaha
shirka.
Ma jirin cid ka socotay dowladda federaalka oo ka qeyb gashay shirka
Baydhabo, waxaana shirkan uu imaanaya iyadoo bishii Maarso loo ballansanaa shir
ay ka wada qeyb geli lahayeen madaxda maamulada iyo dowladda federaalka, kaasi
oo la filayay inuu ka dhaco isla magaalada Baydhaba, lana doonayay in looga
hadlo ammaanka dalka. Lama oga sababta uu shirkaas u baaqday.
Xiriirka qaar kamid ah maamul goboleedyada dalka iyo dowladda dhexe ayaa
muddooyinkii dambe ahaa mid aan wanaagsaneyn, kadib markii ay isku khilaafeen
go'aanka dowladda dhexe ay ka qaadatay khilaafka qaar kamid ah dalalka carabta.
Madaxweynaha maamulka Jubaland, Axmed Islaam, Axmed Madoobe oo dhawaan
booqasho ku tegay dalka Imaraatka ayaa markii uu dib ogu laabtay magaalada
Kismayo waxaaa uu sheegay in dowladda federaalka ay dhinac uga weecatay
go'aankii dhexdhexaadnimada ee ay ka qaadatay khilaafka ka jira dalalka
khaliijka.
Sidoo kale madaxweynaha Puntland, Cabdiweli Maxamed Gaas oo ah guddoomiyaha
golaha iskaashiga ee dowlad goboleedyada Soomaaliya ayaa dhawaan mar uu
booqasho ku tegay dalka Imaraatka waxaa uu madaxda Imaraatka ka codsaday inay
sii wadaan taagerada ay u fidinayaan dowladda Soomaaliya.
Hadlka madaxweyne Gaas ayaa yimid, iyadoo xiligaasi dowladda Isutagga
Imaaraatka Carabta ay sheegtay inay joojinayso iskaashiga milateri ee ay la
leedahay Soomaaliya.
BBC