Sabti, May, 12, 2018 (HOL) –Fadhiggii ay maanta
yeesheen xildhibaannada Golaha Shacabka oo uu shir guddoominayay Guddoomiyaha
Golaha Shacabka Mudane Maxamed Mursal Sheekh C/raxmaan ayaa waxa ay
Xildhibaanada Akhrinta koowaad marsiiyeen Hindise Sharciyeedka Shirkadaha,
waxaana Xildhibaanada u akhriyay Wasiirka Ganacsiga iyo Warshadaha ee
Xukuumadda Federaalka Soomaaliya Maxamed Cabdi Xayir Maareeye.
Xildhibaannada Baarlamaanka Soomaaliya ayaa su’aalo
ku saabsan hidise sharciyaadka weydiiyay Wasiirka wasaaradda Ganacsiga oo
joogay fadhigii mudanayaasha baarlamaanka ee maanta.
Guddoomiye ku-xigeenka koowaad ee Golaha Shacabka Cabdiwali Sheekh Ibraahim Muudey ayaa
xildhibaanada u sheegay in aysan ka maqnaan kulamada Golaha, maadaama golaha
howlo badan ay horyaalaan.
Guddoomiyaha Golaha Shacabka Mudane Maxamed
Mursal Sheekh C/raxmaan oo kulanka soo xiray ayaa sheegay in guddoonka
golaha ay isla garteen in ladayactiro xarunta golaha shacabka, isagoo dhinaca
kalena aad u amaanay howlaha gudiyada golaha, waxaana ugu dambeyn guddoomiyaha
uu ka codsaday xildhibaanada In ay ilaaliyaan waqtiga kulamada guud ee golaha
maadaamaa howlo badan ay golaha horyaalaan.
C/raxmaan Diini, Hiiraan Online
[email protected]
