Warar dheeraad ah oo ka soo baxaya weerar xalay lagu qaaday guriga sarkaal ka tirsan Nabad-sugida
Jimco, May, 11, 2018 (HOL) - Sarkaal ka tirsan nabad-sugida Soomaaliya
ayaa faahin dheeraad ah ka bixiyay weerar xalay lagu qaaday guriga uu ka degan
yahay magaalada Muqdisho kaa oo lagu dilay ilaa Afar ruux.
Sarkaalka oo dalbaday in aan
magaciisa loo adeegsaday warbaahinta oo la hadlay VOA ayaa sheegay rag ka
tirsan sida uu hadalka u dhigay Ururka Al-shabaab xalay weerar ku qaadeen gurigiisa oo ku yaala degmada
Wadajir ee gobolka Banaadir.
Sarkaalka ayaa sheegay in xiliga
uu weerarkan dhacay uu ka maqnaa guriga, laakiin xaaskiisa ku soo war-galisay
in weerar lagu soo qaaday inta badan dadkii ku sugnaa gurigana la dilay kuwa
kalana la dhaawacay.
‘’Waxaa is oo wacday xaaskeyga oo
aan hadalkeeda fahmi waayay, dadkii way dhamaadeen ayay igu tiri, waan soo
cararay, waxaan u imid laba meyd ah iyo laba dhaawacood uu halis yahay, inta
aan Isbitaalka u wadnay ayeey labadii kale u geeriyoodeen dhawacii soo
gaaray” ayuu u sheegay VOA-da sarkaalkan.
Al-shabaab ayaa iyagu sheegtay ay
ka danbeeyeen weerarka lagu qaaday guriga sarkaalkan ka tirsanaa hay’addaha
nabad-sugida.
Magaalada Muqdisho inta badan
waxaa ka dhaca weerarada qorsheysan ee lagu beegsado mas’uuliyiinta dowladda,
saraakiisha ciidamada iyo odayaasha dhaqanka oo ah kuwa ugu badan oo saameeyaan
weerarrada noocan oo kale ah.
C/raxmaan Diini,
Hiiraan Online
[email protected]