Cabdiwali Gaas: Waxaan codsaney in deg deg loogu gurmado dadka ay saameysay fatahaada Beledweyne
Talaado,, 01, May, 2018 (HOL) -Madaxweynaha
dowlad gobolleedka Puntland Cabdiwali Maxamed Cali Gaas oo la hadlay Laanta
Afka Soomaaliga ee VOA ayaa sheegay in ka maamul ahaan siweyn uga xun yihiin
daadadka ku rogmaday magaalada Beledweyne, isaga oo ku baaqay in gurmad deg deg
ah loo fidiyo dadka ay saameysay fatahaada.
‘’Dabcan baaq ayaa u dirnay dowladda federaalka
iyo hay’addaha ay arintan quseyso in si deg deg ah wax loola qabto bulshada ku
dhaqan gobolka Hiiraan iyo guud ahaan reer Hirshabeele oo runtii saameyn weyn
ay ku yeelatay fatahaadan’’ ayuu yiri Cabdiwali Gaas.
Cabdiwali Gaas ayaa sheegay in golaha Iskaashiga
dowlad gobolleedyada baaq wada jir ah oo ay saareen uga dalbadeen beesha
caalamka in dadka ku barakacay fatahaada lala gaaro kaalmo iyo gurmad deg deg ah, waxaana uu ku
tilmaamay fatahaada ku dhufatay Beledweyne in ay tahay masiibo Bani’aadannimo
ee aad u weyn.
Baaqa Cabdiwali Gaas ayaa imanaya xili maalintii
shalay uu booqasho ku tagay magaalada Beledweyne madaxweynaha dowladda
Soomaaliya Maxamed Cabdullaahi Farmaajo oo la kulmay mas’uuliyiinta maamulka
Hirshabeele, iyo waxgaradka gobolka Hiiraan.
C/raxmaan Diini,
Hiiraan Online
[email protected]
