Ra’iisal wasaare Kheyre oo la kulmay kaaliyaha xoghayaha arrimaha dibedda Mareykanka
Khamiis, Maarso, 08, 2018 (HOL)-Ra’iisul Wasaaraha Xukuumadda Federaalka
Soomaaliya Xasan Cali Khayre ayaa magaalada Washington ee dalka Mareykanka kula
kulmay kaaliyaha Xog-hayaha Arrimaha Dibadda dalka Mareykanka David Malpass ,
kulanka oo saacad iyo wax ka badan qaatay ayaa waxaa looga hadlay arrimo badan.
Labada mas’uul ayaa kulankooda diirada ku saaray horumarinta dhaqaalaha
Soomaaliya, xoojinta doorka Mareykanka ee caawimaadda Soomaaliya, dowlad
wanaagga iyo la dagaallanka Argagixisada.
‘’Wada hadalka aan la yeeshay kaaliyaha xoghayaha Arrimaha Dibadda dalka
Mareykanka waxa uu ahaa mid jawi wanaagsan ku soo dhamaaday, ujeedka wuxuu ahaa
sidii loo xoojin lahaa caawimadda Soomaaliya, sidoo kale waxaa jiray kulamo
kale oo aan la yeeshay mas’uuliyiinta dalkan,’’ ayuu yiri ra’iisal wasaare
Kheyre
Ra’iisal Wasaare Kheyre ayaa magaalada
Washington ee dalka Maraykanka uga qeyb galay shirka (Forum Fragility 2018) oo
looga hadlay Maareynta Dhibaatooyinka ka dhasha Nabadgalyo xumida iyo Xasilooni
darada.
Ra’iisul wasaare Xasan Cali Khayre ayaa shirkaasi caalamiga ah kaga jawaabay
su’aalo la xiriiray talaabooyinka ay xukuumadiisu ka qaaday soo celinta
xasiloonida dalka, la dagaalanka saboolnimada, musuqa iyo hagaajinta hanaanka
maamulka dhaqaalaha dalka.
C/raxmaan Diini, Hiiraan Online
[email protected]
