Kheyre oo xalay kormeeray qaar ka mid ah Saldhigyada degmooyinka gobolka Banaadir
Axad, Maarso, 18, 2018 (HOL)–Ra’iisul wasaaraha Soomaaliya Xassan Cali
Kheyre oo ay wehliyeen Saraakiil ka tirsan ciidanka Booliska ayaa xalay kormeer
ku tagay Saldhigyada Booliska degmooyinka H/wadaag, Hodan iyo Dayniile, isagoo
u kuur galayay sida ay u socoto howlaha sugida ciidamada.
Ciidamo gaar ah oo loo diyaariyay sugida amniga caasimadda oo isugu jira
Boolis, Nabadsugid iyo Militari ayuu ka dalbaday in ay u diyaar garoobaan sidii
dalka looga saari lahaa Al-Shabaab.
Ra’iisul Wasaaraha ayaa la hadlay ciidamo gaar ah oo loo diyaariyay sugida
amniga Muqdisho, isagoo kula dardaarmay inay xaqiijiyaan amniga Caasimadda,
kana hortagaan falalka amni daro iyo weerarada Al-shabaab.
Sidoo kale Ra’iisul Wasaaraha ayaa warbixin ka dhageystay saraakiisha
ciidamada ka qeyb qaadanaya sugida amniga, waxaana uu u muujiyay taageero,
isagoo ku hadlayay magaca Madaxweynaha.
Ra’iisul Wasaaraha ayaa todobaadkii hore kormeeray saldhigyo ciidan, sida
saldhiga booliska degmada Huriwaa oo ay ku sugan yihiin ciidamo Boolis ah oo ka
qeyb qaata sugida amniga.
C/raxmaan Diini, Hiiraan Online
[email protected]
