Ciidamada Kenya oo sheegay in ay ka hortageen weerar ay qorsheynayeen Al-shabaab
Jimco, Maarso, 16, 2018 (HOL) – Ciidamada dalka
Kenya ayaa gacanta ku dhigay Hub, Walxaha qarxa iyo qaar ka mid ah Raggii watay
oo la sheegay in ay ka tirsan yihiin Ururka Al-Shabaab.
Joseph Boinne taliyaha ciidamada Booliiska Kenya ayaa
sheegay in ay qalabkani ku soo qabteen howlgallo ballaaran oo ka dhacay Hoteel
ku yaalla magaalada Nairobi iyo degaanka Merti oo ka tirsan gobolka Isiolo,
isagoo sheegay in gaariga waday uu ahaa mid diiwaan-gashan.
Ciidamada Booliska Kenya ayaa sidoo kale gacanta
ku dhigay aaladaha laga sameeyo walxaha qarxa, Shan Qoryaha AK 47 ah, 1,099
Rasaas ah, 36 Qasnadood oo buuxa iyo qalab kale.
Joseph Boinne ayaa xusay in hubka ay soo qabteen
ku jiraan 80-Kg oo ah maadada qaraxda ee TNT loo yaqaano taas oo uu tilmaamay
haddii qarax loo adeegsan lahaa ay galaafan lahayd nolosha Boqolaal shacab ah,
sidoo kalena ay bur burin laheyd dhismayaal badan.
Ciidamada Booliiska ayaa xabsiga dhigay, Cabdi
Majiid Aadan, oo 24 jir ah, iyo Maxamed Nane, kaddib markii lala xiriiriyay in ay
ka dambeeyeen weerarkan fashilmay, waxaan ay howl wadeennada ay jiifeen
Hoteelka oo ka soo horjeeda Saldhigga Booliska Nairobi, iyaga oo dhawaan raggan
u safray deegaanka uu howl-galku ka dhacay ee Merti oo ka tirsan Isiolo.
C/raxmaan Diini, Hiiraan Online
[email protected]