Sabti, June, 09, 2018 (HOL) – Guddiga difaaca Puntland oo maanta
mar kale shir jaraa'id ku qabtay magaalada xarunta ah ee Garoowe ayaa ka
jawaabay hadal dhawaan uu jeediyay guddoomiyaha xisbiga UCID ee Soomaaliland,
Faysal Cali Waraabe.
Wasiirka arrimaha gudaha
Puntland,Cabdullaahi Cali Xirsi (Tima-cadde) wuxuu sheegay inay ahayd wax laga
xumaado hadalka Faysal Cali Waraabe oo u sheegay inuu ku baaqay in la'laayo
ardayda Puntland ka soo jeedda ee deegaannada wax ka barata.
"Toddobadii bishan June mas'uul
u hadlay Soomaaliland oo lugu magacaabo Eng Faysal Cali Waraabe ayaa sheegay
inuusan jirin Shabaab iyo Daacish , wuxuuna ku daray in dadkii ay laayeen
ciidamada Puntland inay ahaayeen ciidamo kale oo isagu oggaa magacyo kalana ugu
yeeray.. isagoo ku sii daray mas'uulkaasi u hadlay Soomaaliland in la'laayo
Ardayda reer Puntland ee wax ka barata jaamacadda Camuud ama Soomaaliland oo
dhan." ayuu yiri wasiirka arrimaha gudaha Puntland.
Timacadde wuxuu ku baaqay dowladaha
la-dagaallama argagisixada iyo dambiyada caalamiga ah inay furaan baaritaan
caalami ah oo lugula soconnayo wax uu ku sheegay dhaqdhaqaaqyada
"argagixiso ee ay Soomaaliland ka wado Puntland iyo Soomaaliya inteedda
kale".
Docda kale, afhayeenka madaxtooyadda
Puntland,Cabdullaahi Maxamed Jaamac (Quraan-Jacel) oo shirka jaraa'id qeyb ka
ahaa wuxuu sheegay inay dib usoo celinayaan ku dhawaad 900 arday oo ka soo
jeedda Puntland, kuwaas oo wax ka barta jaamacadaha ku yaalla Soomaaliland,
wuxuu ardayda ugu baaqay inay dib ugu soo laabtan deegannadooda, isagoo si la
mid ah jaamacadaha ka dalbadey inay ardayda u fududeeyaan siddii ay
waxbarashadooda u wareejin lahaayeen,hadalka oo u sheegay inuu jawaab u ahayd
digniintii ardayda ka dhanka ahayd oo u sheegay inuu jeeddiyay Eng Faysal.
Xiisada colaadeed ee u dhaxeysa
Puntland iyo Soomaaliland , ayaa muddooyinkii dambe joogto ka dhigtey in
hadallo ay warbaahinta isku mariyaan mas'uuliyiin labada dhinac u hadlaya,
waxaana hadalkii u dambeeyay ee u jeediyay guddoomiyaha xisbiga UCID
cambaareeyay dad ku sugan gudaha iyo dibadda - iyo xata jaamacadda Camuud oo ay
dhigtaan ardayda ugu badan ee wax ka barata deegaannada Soomaaliland, kuwaas oo
ka soo jeedda Puntland.
Iman Jama