Sabti, June, 09, 2018 (HOL) – Dadka ku nool
gobolka Tigray ee dalka Itoobiya ayaa
dhigay dibadbax ay uga soo horjeedaan go’aankii dowladooda ee ku aadanaa in la
dhaqangaliyo heshiiskii nabadda ee lagu soo afjaray dagaalkii xuduuda ee kala
dhaxeya Eritrea.
Ku dhawaad 6,000 oo ah dadka ku nool xuduuda
labada dal ayaa ka qaybgalay dibadbaxyada.
Waxa ay dadkan sheegeen in dadkooda la kala
qaybinayo haddii qaar ka mid ah dhulkooda lagu wareejiyo Eritrea.
Ciidamada Itoobiya ayaa ku sugnaa dhul ay guddiga
xuduudaha ku wareejiyeen dowladda Eritrea.
Tobannaan kun oo qof ayaa ku dhintay dagaalkii
muddada labada sano ah ka socday xuduuda labada dal, Dagaalkan ayaa la soo
afjaray 18 sano ka hor.
Dhawaan ayay ahayd markii dowladda Itoobiya ay
shaacisay in dhaqangalinayso warbixintii ay soo saareen guddigii Qaramada
Midoobay.
C/raxmaan Diini, Hiiraan
Online
[email protected]