Jimco, June, 08, 2018 (HOL) – Faah faahin dheeraad ah ayaa ka soo
baxaya weerar xalay xooggag ka tirsan Al-shabaab ku qaadeen saldhigyo
ciidamada dowladda iyo kuwa Itoobiya ku leeyihiin degmada Waajid.
Al-shabaab ayaa lagu waramayaa in ay labo jiho ka
weeraray degmada Waajid, iyadoo ay beegsadeen xeryaha labada ciidan, waxaana
halkaasi ku dhexmaray dagaalka hubka waa weyn la’isku adeegsaday.
Dadka deegaanka ayaa sheegay in dagaalku uu ku
bilowday qaraxyo iyo gantaalaha garbaha laga tuuro ee baasuukaha/sabanka, ka
dibna ay labada dhinac isu adeegsadeen hubka noocyadiisa kala duwan.
Sarkaal ka tirsan ciidamada dowladda oo lagu
magacaabo Jaamac Faarax Muuse ayaa
sheegay in ay iska difaaceen xoogaggii soo weerarayy, wuxuuna beeniyay wararka
sheegaya in Shabaab ay gudaha u soo galeen xaafad ka tirsan xaafadaha degmada
Waajid.
Sarkaalkan ayaa carabka ku adkeeyay in ay ka
hortaggeen in Shabaabku gudaha u soo galaan xaafadaha degmada, isla-markaana ay
dib ugu celiyeen halkii ay ka yimaadeen.
Sarkaalka ayaa sheegay in xoogagga weerarka soo
qaaday ahaayeen kuwo xooggan, kuna soo talagalay in wax-yeelo ka gaystaan.
C/raxmaan Diini, Hiiraan
Online
[email protected]