Khamiis, June, 28. 2018 (HOL) -Dabley hubaysan ayaa rasaas la
beegsatay saldhiga ku yaala badhtamaha magaalada Laascaanood ee xarunta Gobolka
Sool.
Weerarkan ayaan la sheegin sax
khasaare ah oo uu geystey sida ay dad badan u cadeeyeen Hiiraan.
Mas’uuliyiinta Gobolka Sool ayaa
isku raacay in dableyda weerarka geystey ay ahaayeen sadex nin oo hubaysan.
"Waxaan arkaayey sadex nin oo
ordaya una socda dhinaca buurta Seyidka, waxyar ka dib goortii xooga rasaastu
joogsadey, ciidankuse meel aad uga fog halka ay marayeen ayay xabado ka
ridayeen" sidaa waxaa HOL u sheegay nin dhalinyaro ah oo meel goobta
xoogaa u jirta.
Askari ka cudurdaartay in la sheego
magiciisa ayaa yidhi " 2:55 habeenimo ayaan aragnay sadex nin oo hubaysan
oo kala leexday askari ayaa isku deyey in la joojiyo balse ninkii dhinaca maray
ayaa soo ridey rasaas bastoolad ka dhacaysey, kadibna labadii kale ayaa
tacshiirad soo bilaabay kooban" intaa wixii ka danbeeyey waxaa bilaabmay
falcelintii booliska ayuu raaciyey.
Weeraradan ka bilaabmay magaalada
Laascaanood ayaa la xidhiidha colaada ka taagan magaalada Tukaraq, waxaana ay
sababi kartaa in ciidamo ka baxsan booliska ay magaalada soo galaan, iyadoo
maalmo uun laga joogo xiligii duulaano kale oo dhacay maamulka Puntland
sheegteen.
Seynab Cabdi Warsame
