Axad, June, 24, 2018 (HOL) - Wasiirka maaliyadda Puntland, Cabdullaahi Saciid Carshe oo
wariyayaasha kula hadlay Garoowe ayaa iska fogeeyay eedeymo uu usoo jeediyay
xisaabiyaha wasaaradda ee gobolka Mudug oo maanta shir jaraa’id ku
shaaciyay xilka in uu iska casilay.
Wasiir Carshe, wuxuu sheegay in
xisaabiyaha gobalka Mudug shaqo joojin lagu sameeyay is casilaadiisa ka hor,
waxaana uu xusay inuu magacaabay guddi baara eedaymo laga soo gudbiyay.
“ Ma aha wax sax ah eedeymaha iyo
xisaabta uu baahiyay xisaabiyaha ... waxaana shaacinaya inan magacaabay guddi
baara eedeymaha, mana jirto wax lacag ah oo aan waydiistay si shaqsi
xisaabiyaha oo xilka laga qaaday ka hor is casilada uu sheegay.” ayuu yiri
Wasiirka maaliyadda Puntland.
Gabagabadii, wasiirka ayaa sheegay
xisaabiyaha gobolka Mudug inuu ku socdo baaritaan ku aaddan lacago mushaar
ciidan ah oo ku maqan, xubno ka socda wasaaradana ayna ku suganyihiin magaalada
Gaalkacyo, sida u xaqiijiyay Wasiirka maaliyadda.
Iman Jama
