Axad, June, 24, 2018 (HOL) - Ganacsatada suuqyada magaalada
Gaalkacyo ee xarunta gobolka Mudug ayaa ka cabanaya lacago badan oo shilin
Soomaaliga oo suuqyada la soo galiyay, waxaana taasi ay dhalisay in shalay laga
diiddey suuqyada shilin Soomaaliga.
Maxamed Cismaan, oo ka mid ah ganacsatada koonfurta
Gaalkacyo ayaa u sheegay Hiiraan Online in dadka ay ka walwalsanyihiin
lacagta cusub ee ay soo bandhigtay dowladda federaalka, wuxuuna qof walba
doonaya lacagta uu hayo ee shilin Soomaaliga inuu u badalo doollar.
"Lacagta baddan ee suuqyada la
soo galiyay ayaa sababay in shilin Soomaaliga la diiddo, qof walbana wuxuu ku
leeyahay lacagta cusub inta aysan soo bixin ayaan doollar u badalaya kaashka
aan hayo." ayuu yiri Maxamed Cismaan.
Diidmada lacagta waxaa ay sababtay
in sarifka doollarka uu kor u kaco, waxaana shalay lugu badalayay boqolka
doollar afar malyan oo shilin Soomaali ah.
Ugu dambeyn, guddoomiye ku-xigeenka
maamulka iyo maaliyadda Galmudug ee gobolka Mudug,Axmed Maxamed Shire ayaa u
sheegay warbaahinta in tallaabo laga qaadi doono ganacsatada diidda lacagta
shilin Soomaaliga, wuxuuna inta ku daray dad uu ku sheegay qas-wadayaal inay ka
dambeeyaan diidmada lacagta, dadka oo u sheegay hay'adaha ammaanka inay dabagal
ku hayaan.
Iman Jama
