Sabti June, 23, 2018 (HOL)- Dagaal culus isugu
jiray Qaraxyo iyo mid toos ah ayeey xalay Al-shabaab ku qaadeen kolanyo ay la
socdeen ciidamada howlgalka midowga Africa AMISOM meel ku dhaw degmada Afgooye
ee gobolka Shabeellaha Hoose.
Cabdifitaax Xaaji Cabdulle oo ah guddoomiye ku-xigeenka
gobolka Shabeellaha Hoose oo la hadlay Laanta Afka Soomaaliga VOA ayaa sheegay
in Al-shabaab weerar ku qaadeen gadiid ay la socdeen ciidamada AMISOM oo ka soo
laabtay deegaanka Bali-doogle ee saldhig u ah ciidamada dowladda.
‘’Gadiidkan oo sahay geeyay xero ciidan oo ku
taala Bali-doogle ayaa markii ay soo laabteen waxaa waddada u galay xoogag ka
tirsan Al-shabaab waxaa halkaa ka dhacay iska horimaad culus oo labada dhinac
ah, Al-shabaab waxaa ay halkaa ku qarxiyeen labo gadiid ah oo ka tirsanaa
kolanyadii la socda ciidamada mid kalana waa ay kaxeysteen, laakiin markii ay
sii wadi waayeen ayeey meel dhexe ku gubeen’’ ayuu yiri guddoomiye ku-xigeenka.
Cabdifitaax ayaa intaa ku daray in ay jirto
dhimasho badan laakiin aan la xaqiijin karin inta ay la eg tahay dhimashada,
madaama ayuu yiri dhulka lagu dagaalamayay uu ahaa mid howd ah oo dhul beeraley
ah.
Ma jiro ilaa iyo hadda wax war ah oo ka soo baxay
dhinac howlgalka midowga Africa AMISOM oo ka hadlaya weerarka xalay ka dhacay
gobolka Shabeellaha Hoose.
C/raxmaan Diini, Hiiraan
Online
[email protected]