Khamiis, June, 21, 2018 (HOL) - Haweeneydan oo
lagu magacaabo Mumina Eroba oo ay Boliiska dalka Kenya madaxeeda dul dhigeen
Hal Milyan oo Shilin Bil ka hor ayaa maqribnimadii Talaadada isku dhiibtay
laamaha ammaanka ee dalkaasi.
Waxaa lagu tuhusan yahay in ay ka tirsan tahay Al-Shabaab, waxaana lagu
eedeeyay inay wax ka qorsheysay weerarkii Bishii February ee sanadkan ka dhacay
Tuulada Qarsa oo ka tirsan Wajeer, halkaas oo ay ku dhinteen Saddex Qof oo Laba
ka mid ahi ay ahaayeen Macallimiin.
Isku duwaha Gobolka waqooyi-bari dalka Kenya, Maxamuud Saalax ayaa
Jariiradda The Star u sheegay in isa soo dhiibista Haweeneydani ay guul weyn u
tahay dagaalka lagula jiro Shabaab.
Eroba, ayaa ah Hooyada Cabdiwahab
Cusmaan Axmed, oo isna lala xiriirinayo weerar ay ku dhinteen Siddeed Askari oo
ka dhacay Wajeer, waxaanay sidoo kale hay’adaha amnigu weli raadinayaan Axmed
Debar, oo ka mid ah eedeysanayaasha.
Kenya ayaa
wadda qorshe lagu wacyi gelinayo Bulshada qaybaheeda kala duwan oo ku aaddan
sidii looga feejignaan lahaa xubnaha dadka ka dhaadhiciya fekerka
Argagixisanimada ee ka tirsan Al-Shabaab, iyadoo ay Dowladda Kenyana ku
guuleysatay inay dib ugu soo laabtaan dhallinyaro badan aragtiyadii hore.
C/raxmaan Diini, Hiiraan
Online
[email protected]