Talaado, June, 19, 2018 (HOL)
-Madaxweynaha maamul goboleedka Hirshabeelle Maxamed Cabdi Waare ayaa soo
dhoweeyay heshiiska maalgashiga Afarta Dekedood ee ay Sabtidii la soo dhaafay
ay Muqdisho ku wada gaareen Madaxweynaha Soomaaliya Maxamed C/llaahi Farmaajo
iyo Ra’iisul Wasaaraha Itoobiya Abiy Ahmed.
Waxaa uu sheegay in
heshiiskaas uu Hirshabeelle u yahay dano aad u weyn iyo horumar mustaqbalka,
maadaama ay xuduud la leeyihiin Itoobiya.
“Aad ayaan u soo dhaweyneynaa Heshiiskaas, waayo annaga xuduud ayaa ku xignaa, in la furo Kastamka
Feer Feer meeshaas ay noqoto meel laga ganacsado intii xero milateri ku ooli
laheyd, maalintii ay isu gudbaan boqol baabuur, dadka is dhex maro, dadka ka
yimaada Mustaxiil ay yimaadaan Beledweyn, Godey iyo Beledweyn la isu maro,
jidadka la sameeyo”ayuu yiri Madaxweyne Waare.
Madaxweyne Waare ayaa sheegay
in haddii heshiiskaas laga mira geliyo uu waa cusub u baryayo Geeska Afrika,
isagoo xusay inuu aaminsan yahay in heshiiska afarta Dekadood inay Dekeda
Cadale noqoto tan ugu horeysa.
“Waxaa aaminsanahay in Dekedda
Cadale laga dhisayo ay noqoto afarta dekeda ugu horeysa, Dekedaas ay noqoto
deked Lojisticik, in jid laga bixiyo, Jid Tareen laga bixiyo, anaga
Hirshabeelle ahaan waxa anoo muuqda horumar weyn”ayuu yiri Madaxweynaha
Hirshabeelle.
Hogaamiyayaasha dowladdaha
Soomaaliya iyo Itoobiya ayaa dhawaan uga dhawaaqay magaalada Muqdisho heshiis
iskaashi oo dhaxmara labada dowladdood, waxaana ka mid ah in si wada jir ah u
wadamaalgashadaan Afar Dekeddood.
C/raxmaan Diini, Hiiraan
Online
[email protected]
