Sabti, June, 16, 2018 (HOL) –
Marka laga soo tago saameynta siyaasadeed iyo militari ee dowladda Itoobiya ay
ku leedahay Soomaaliya haddana dhinaca kale tan iyo wixii ka danbeeyay
heshiiskii DP World ee Dekedda Berbera
waxaa jiray madmadow siyaasadeed oo soo kala dhaxgalay labada dowladdood
Soomaaliya iyo Itoobiya.
Soomaaliya waxaa ay u aragtay
heshiiskaa mid dhaawacaya jiritaanka Qarannimada Soomaaliya, Itoobya-na 19% ayeey ka qaadatay saami-qeybsiga dekedda
Berbera, hasse ahaatee go’aan bishii Maarso ee sanadkan uu gaaray Baarlamaanka
Soomaaliya ayaa gabi ahaanba dalka looga mamnuucay shirkadda DP World, waxaana uu
baarlamaanku ku tilmaamay heshiiskii Berbera mid xaaran ah oo aan sharuucda
dalka waafaqsaneyn.
Tan iyo wixii xiligaa ka
danbeeyay dowladda Soomaaliya iyo Imaaraadka xiriirkooda ma wanaagsaneyn oo
toos ah ayeey warbaahinta cambaareyn isugu mariyeen, laakiin marnaba dowladda
Soomaaliya ma aysan soo hadal qaaday Itoobiya oo aheyd dowladda kaliya ee
heshiiskaasi ku jirtay marka laga soo tago shirkadda DP World iyo Somaliland.
Laakiin haddana mar walba waxaa
soconayay kulamo hoosaadyo ay lahaayeen wafuud ka kala soctay labada dal
Soomaaliya iyo Itoobiya oo malaha qodobada ugu waaweyn oo ay ka wada hadlayeen
ay ka mid aheyd arinta Dekedda Berbera iyo aragtida dowladda Soomaaliya.
Wada-xaajoodkaa waxaa ugu
danbeeyay safarkii ra’iisal wasaaraha Soomaaliya Xassan Cali Kheyre iyo wafdi
uu horkacayo ay ku tageen Addis Ababa oo la rumeysan yahay in uu ka soo baxay
socdaalka uu maanta ku yimid Muqdisho ra’iisal wasaaraha Itoobiya Abiy Ahmed.
Wuxuu ahaa socdaal u muuqday in
dowladda Itoobiya u hogaansan tahay ilaalinta Qarannimada iyo madax-bannaanida
Soomaaliya, madaama heshiiskii Berbera la oran karo wuxuu ahaa mid awood dheeraad ah siinaya Somaliland oo
sanadkii 1991kii ku dhawaaqday in ay go’day Soomaaliya inteeda kale.
Heshiiska labada dowladeed ee
maanta la shaaciyay waxaa qeyb ka ahaa maal-gashigga Afar Dekeddood iyo
dhismaha Wadooyin Laami ah, laakiin Dekedaasi
lama sheegin kuwa ay kala yihiin.
Wax-yaabaha kale ee heshiiska ku
jiray waxaa ka mid ahaa in labada dal midba midka kale uu xushmeeyo madaxbannaanidiisa,
Qaranimada iyo Xornimada Siyaasadeed, iyada oo sidoo kale ay ka wada shaqeeyaan
sidii loo xoojin lahaa midnimada Soomaaliya.
Socdaalka ra’iisal wasaaraha
dhawaan uun xilka la wareegay ee Itoobiya Abiy Ahmed ayaa la oran karaa waxaa
uu soo afjarayaa shakigii iyo madmadowgii siyaasadeed ee ka dhashay heshiiskii
Berbera ee DP World, waxaana muuqata in labada dowladdood hogaamiyayaashooda
sar sare arintaa isla meel dhiggeen.
C/raxmaan Diini, Hiiraan Online
[email protected]
