Jimco, , June, 15, 2018 (HOL)–
Madaxweynaha Somaliland Muuse Biixi Cabdi ayaa cafis u fidiyey Maxaabiista
dambiyadda fudud ku xukuman ee xabsiyada dalka ku xidhan.
Ku dhowaad shan boqol iyo kow
iyo toban maxbuus ayaa dib loo siiyey xoriyadoodii bisha Ciida Ramadaan awgeed,
waxaana maxaabiistan loo kala saaray siday u kala dambi fudud yihiin.
“Madaxweynaha Somaliland,
Mudane Muuse Biixi Cabdi waxa uu munaasibada ciidal fidriga awgeed wareegto
madaxweyne oo sumadeedu tahay JSL/XM/WM/222-113/062018 uu cafis u fidiyey
Maxaabiista dembiyada fudud ku xukuman ee xabsiyada dalka ku xidhan, oo
tiradoodu dhan tahay 511 (Shan Boqol iyo Kow iyo Toban) maxbuus”ayaa lagu yiri
qoraal ka soo baxay xafiiska madaxweynaha.
Dhinaca kale, madaxweynuhu
wuxuu hambalyo u diray shacabka Somaliland iyo guud ahaan dunidda Islaanka,
waxaanu ku hambalyey fadliga Ciiddul fidriga awgeed.
“Munaasibadda ciidul-fidriga
awgeed waxa aan hambalyo u dirayaa dhammaanba ummadda Islaamka meel ay
joogtaba, gaar ahaan ummadda reer Somaliland, Ilaahay isaga ayaa awood leh ee
ha inaga aqbalo soonkii, ducadii iyo cibaadadii aynu bishan Ramadaan soo
gudannay muslim ahaan, Ilaahayna dambi-dhaaf ayeynu ka baryeynaa, wixii
dhibbana dhibta haka qaado.”ayuu yidhi Biixi.
Dhinaca kale, madaxweynuhu
waxa uu dhambaal hambalyo ah u kala diray guud ahaan shucuubta Islaamka iyo in
ka badan 40 (Afartan) dal oo uu madaxweynuhu qoraalo Hambalyo ah ugu gudbiyey
Hambalyada Ciidal-fidriga awgeed.
Barkhad-ladiif M. Cumar,
Hiiraan Online
[email protected]
Hargeysa, Somaliland.
