Isniin, July, 09, 2018 (HOL) - Ra’isal Wasaaraha Is-bedel doonka
ah ee Itoobiya Abiy Axmed oo xilkan loo doortay bishii April ee la soo dhaafay waxaa
uu gar-waaqsaday in la soo afjaro dagaal muddo ka badan 20 sano dalkiisa kala
dhaxeeyay dowlad ay dariska yihiin ee Eritrea.
Tallaabadan uu qaaday ra’iisal wasaaraha Itoobiya marka laga
soo tago faa’iidada ugu jirta labada dal, dhinaca kale waxaa la leeyahay heshiiskan waxaa uu muhiim u
yahay nabada gobolka oo idil, gaar ahaan dowladdaha dariska la ah dalalkan
heshiiska taariikhiga ah gaaray.
Gaar ahaan Soomaaliya ayaa ka
dhaxli doonta heshiiskan degenaasho siyaasadeed iyo mid Amni intaba, madaama colaada muddada dheer
soo jirtay ee labada dowladood sababtay fara-galin uga imanayay labada dal,
gaar ahaan Eritrea oo muddo dheernab lagu eedeeynayay in ay taageero hoose
siiso kooxda Al-shabaab iyada oo ku xumeyneysa dowladda Itoobiya oo dagaal kula
jirtay kooxaha Argagixisada oo ay Al-shabaab-na ka mid tahay.
Sidoo kale heshiiskan ayaa dhinac
kale la sheegay in uu baal cusub oo ah Soomaalida ka wada hadli karaan wixii khilaaf ah ee u dhaxeeya, iyadoo tusaala ugu fiican loo soo qaadanayo in Muqdisho iyo Hargeysa meel iska dhiggi karaan muran siyaasadeedka muddo dheerba soo jiitamayay dib-na u midoobi karaan.
Abiy Ahmed ayaa sheegay in dib
loo bilaabayo dulimaadkii labada dal, khadkii is gaarsiinta iyo in Itoobiya ay
ka faa’ideysan doonto isticmaalka dekedda Eritrea, waxaana sidoo kale heshiika
ku jira in dadka reer Eritrea booqan karaan eheladooda ku nool Addis Ababa.
Madaxweynaha muddada dheer ka talinayey dalka
Eritrea, Issias Efewerki ayaa soo dhaweeyay niyad wanaaga ra’isul-wasaaraha
da’da yar ee Ethiopia, Abyi Ahmed, kaasi oo shalay markii ugu horreysay
booqasho rasmi ah ku tegay caasimadda dalka Eritrea ee Asmara.
Gobalka oo idil ayaa heshiiskan soo dhaweeyay,
gaar ahaan Eritrea laftirkeeda ayaa ka faa’iidi doonta heshiiskan madaama ay muddo dheerba saarneyd cunaqabateyn uga imanayay QM oo ku eedeysay xukuumadda
Asmara in ay taageerto kooxaha Argagixisada gaar ahaan Ururka Al-shabaab,
inkastoo mar walba Eritrea ay beenineysay eedeymahan.
Dadka siyaasada ka faalooda ayaa rumeysan in Eritrea
markan heysato fursad caalami iyo mid gobaleed, si ay mar kale ugu soo muuqato masraxa
siyaasadda iyo kulamadda Ururradda caalamiga, waxaana hor yaalla fursad ay ku
heshisiin karto dowladda Itoobiya iyo
Ururka xoreynta ee ONLF, oo ay madaxdooda haatan ku sugan yihiin Asmara.
C/raxmaan
Diini, Hiiraan Online
[email protected]