Khamiis, July, 05, 2018 (HOL) – Kulan looga
hadlayay dardar-galinta Amniga magaalada Muqdisho ayaa xalay lagu qabtay
xarunta Dowladda Hoose ee Xamar.
Kulankan ayaa waxaa goobjoog ka ahaa Wasiiro ka
tirsan xukuumadda oo uu ugu horeeyo Wasiirka arrimaha gudaha, Xildhibaano,
Guddoomiyaha gobolka Banaadir, Taliyeyaasha Ciidamada Booliska iyo Nabad
Sugidda Soomaaliya, Saraakiil ciidan iyo xubno kale.
Inta uu kulanka socday ayaa waxaa aad looga
hadlay sida ugu sahlan ee loo dardargelin karo sugidda amniga magaalada
Muqdisho, iyada oo ay iskaashanayaan ciidamada amniga iyo shacabka.
Intii uu kulanku socoday waxaa warbixinno laga
dhageystay guddoomiyayaasha degmooyinka iyo saraakiisha ammaanka kuwaa oo si
guud uga hadlay halka ay marayaan howlgallada lagu sugayo amniga magaalada.
“Shirka oo
socday mudo saacado ah ayaa waxaa looga dooday sidii sida ugu dhaqsiyaha baan loogu
bilaabi lahaa wajiga labaad ee hawlaha xasilinta caasimadda, maamulka gobolka
wuxuu ka qaadanayaa wixii looga baahnaa, waxaan diyaar u nahay in la arko
magaalada oo nabad ah, waxaan rajeyneynaa in wajiga labaad ee xasilinta marka
uu bilowdo in magaalada si weyn looga dareei doono.” ayuu yiri Xog-hayaha guud
ee gobolka Banaadir.
Shirkan ka dhacay Aqalka Dowladdda Hoose ee Xamar
ayaa qeyb ka ah kulamo maalmihii dambe lagu qabanayay magaaladfa Muqdisho,
waxaana looga hadlayay xoojinta amniga caasimadda.
C/raxmaan Diini, Hiiraan
Online
[email protected]