11/14/2018
Today from Hiiraan Online:  _
Wararka Maanta- Khamiis, July 26, 2018
Warbixin –Shaki laga qabo in xujeyda Soomaaliya sanadkan ka baaqdaan Xajka


 

Khamiis, July, 26, 2018 (HOL) –Khilaafka ka taagan arrimaha Xajka ee ku saleysan qaadista xujeyda Soomaalida ee doonaya in ay sanadkan soo xajiyaan, ayaa u muuqda mid mugdi sii galinaya rajadii Kumannaan Kun oo Soomaali ah ka qabeen in ay ka mid noqdaan malaayiinta muslimiinta ah ee gudanaya waajibaadka xajka.

Bishan July dhamadkeeda ayeey aheyd sidii horey-ba looga bartay Shirkadaha  in la bilaabo qaadista dadka Soomaalida ah ee doonaya in ay ka xajiyaan gudaha dalka, hasse ahaatee warar xog-ogaal ah oo ay heshay Hiiraan Online ayaa sheegaya in hadda arintaasi muuqan.

Sababaha ugu weyn ee dib u dhacan keenay ayaa lagu sheegay muran soo kala dhax-galay dowladdaha Sacuudiga iyo Soomaalida oo isku khilaafay shirkaddaha xujeyda ka daabulaya Soomaaliya, kaddib markii ay dowladda Soomaaliya ku kordhisay saddex shirkadood kuwii horay looga bartay in ay sanad walba xiligan oo kale dalka Sacuudiga u qaadaan xujeyda.

Dowladda Sacuudiga ayaa sheegtay in ay oga-shahay oo kaliya in ay dalkeeda soo gaarsiiyaan dadka ka soo xajinaya gudaha dalka Soomaaliya shirkaddaha kala ah Jubba Arweys, iyo Daallo oo muddo dheer-ba ku guda-jiray arrimahan.

Hasse ahaatee dowladda Soomaaliya ayaa dhinaceeda ku soo dartay in ay ka qeyb-qaataan qaadista xujeyda saddex sharkadood oo kala ah Ocean Airline, African Express, Freedom Airline, arintaa oo ay siweyn uga biyo diiday dowladda Sacuudiga.

Mas’uuliyiin ka tirsan dowladda gaar ahaan wasaaradda Arr Diinta iyo Aw-Qaafta oo xalinta arintan dardeed u tagay dalka Sacuudiga ayaa wali wax ka war ka soo saarin haddii uu jiro is afgarad laga gaaray is-mari-waaga ka taagan dhinaca shirkaddaha.

Sidoo kale waxaa arintan walaac weyn ka muujiyay siyaasiyiin iyo qeybaha kala duwan ee bulshada oo sheegay in arrintan ay u muuqato mid marka danbe keeni karta in sanadka xujeyda Soomaalida tagin aysan soo xajin.

Madaxweynaha dowladda Soomaaliya Maxamed Cabdullaahi Farmaajo iyo Ra’iisal wasaare Xassan Cali Kheyre ayaa wali dhinacooda wax war ka soo saarin khilaafkan taagan.

C/raxmaan Diini, Hiiraan Online
[email protected]







Click here
7/26/2018 1:16 PM EST
Khamiis, July, 26, 2018 (HOL) –Sawir qaade ka tirsanaa TV SBS xaruntiisa magaalada Muqdisho oo lagu magacaabi jiray Cabdirisaaq Khaasim Imaan ayaa waxaa gallinkii danbe ee maanta toogasho ku dilay askari tirsan ciidamada dowladda.

7/26/2018 11:53 AM EST
Khamiis, July, 26, 2018 (HOL) –Kulan Golaha Wasiirada Soomaaliya ay maanta oo Khamiis ah ku yeesheen magaalada Muqdisho ayaa lagu ansixiyay magacaabista Ilaa Saddex Safiir oo aan la sheegin dalalka loo magacaabay.

7/26/2018 10:32 AM EST
Khamiis, July, 26, 2018 (HOL) – Madaxweynaha Jamhuuriyadda Federaalka Soomaaliya ayaa maanta soo xiray ololaha Xoogaga wadaniyiinta Gobolka Banaadir kuwaas oo ka qeyb qadanaya barnaamijyada wacyigalinta iyo xasilinta caasimadda iyadoo munaasabadaan xiritaanka ah uu soo qaban qaabiyay maamulka gobolka Banaadir.

7/26/2018 7:15 AM EST
Khamiis, July, 26, 2018 (HOL) – Ra’iisal wasaaraha dalka Itoobiya Abiy Ahmed ayaa lagu wadaa in maanta safarkiisii ugu horeeyay uu ku gaaro magaalada Washington ee dalka Mareyknka, isaga oo 30ka bishan-na lagu wado in uu tago magaalada Minneapolis ee gobolka Minnesota.

7/26/2018 4:27 AM EST
Khamiis, July, 26, 2018 (HOL) – Maxkamadda darajada koowaad ee ciiamada qalabka sida ayaa waxay ku dhawaaqday Xukun dacwad ciqaabeed loo heystay eedeysane Jaamac Xusseen Xasan Nuuni oo xafiiska xeer ilaalinta ciidamada Qalabka sida ay ku soo eedeysay inuu ka tirsan yahay Kooxda Argagixisada Daacish una qaabilsanaa farsameynta Qaraxyada.

7/26/2018 3:57 AM EST
Khamiis, July, 26, 2018 (HOL)–Warshaddii Furaash-yadda ee Hargeysa ku taalla ayaa xallay xili dambe dab ka qarxay,inkastoo aanu khasaare badan soo gaadhin cidna waxba ku noqon.

7/26/2018 2:30 AM EST
Khamiis, July, 26, 2018 (HOL) –Waxaa soo baxaya eedeymo ay u jeedinayaan ciidamada Kenya qoysaska 46 ruux oo lagu la’yahay howlgalo ciidamada ka sameeyeen gobolka xeebta ah oo lagu baacsanayay kooxo ka tirsan Argagixisada iyo burcad.

7/26/2018 2:02 AM EST
Khamiis, July, 26, 2018 (HOL)–Ciidamada dowladda Soomaaliya ayaa xalay gurigiisa degmada Waaberi ee gobolka Banaadir ka soo qabtay agaasimihii Wasaaradda Maareynta Masiibooyinka Daahir Maxamed Nuur oo lagu soo eedeeyay musuq-maasuq.

7/26/2018 1:05 AM EST
Khamiis, July, 26, 2018 (HOL)–Wali waxaa soconaya dagaallada iyo iska horimaad-yada u dhaxeeya Qowmiyadaha Oromada iyo Soomaalida, waxaana saacadihii ugu danbeeyay lagu waramayaa in maleeshiyo ka tirsan Qowmiyada Oromada ay dileen Afar Ruux oo Soomaali ah.

7/26/2018 12:20 AM EST
Khamiis, July, 26, 2018 (HOL)–Wareegto ka soo baxday xafiiska ra’iisal wasaaraha xukuumadda Soomaaliya Cali Khayre maanta oo ay Taariikhda ku beegan tahay 26ka July 2018 waxaa xilkii Wasiirka Wasaaradda Waxbarashada looga qaaday Cabdiraxmaan Daahir Cismaan.