Dhalinyaro Soomaaliyeed oo saacadihiii la soo dhaafay lagu dilay dalka Koonfur Africa
Arbaco, July, 25, 2018 (HOL) - Labo dhalinyaro Soomaali ayaa saacadihii ugu
danbeeyay lagu waramayaa in lagu dilay xaafaddaha isku raranka ah ee galbeedka
magaalada Cape Town dalka Koonfur
Africa sida laga soo xigtay Jaaliyada
Soomaalida Koonfur Africa.
Dhalinyarada la dilay ayaa lagu kala magacaabi jiray
Ismaaciil Cabdi Macow iyo Cali Maxamuud Cadow oo xalay la dilay, sidoo kalana
waxaa la dhaawacay saddex dhalinyaro Soomaali ah gudaha magaalada Cape Town ,
kuwaa oo dhaawaca kaddib laga qaaday
hantidii dukaanka u taalay.
Dilalkan ayaa lagu waramayaa in
ay geysanayaan burcad madow South African ah, kuwaa oo la sheegay in ay u
socdaan koox koox, qaarkood-na isku soo ekeysiiya dad macaamiil ah oo doonaya
in ay dukaamada wax ka iibsadaan.
Ma jirto wax tallaabo ah oo ay
dowladda Koonfur Africa ka qaaday kooxahan dilalka iyo dhaca u geysanaya ganacsatada Soomaaliyeed , inkastoo marar
badan oo hore saraakiisha Amnigu sheegeen in ay wax ka qabanayaan.
C/raxmaan
Diini, Hiiraan Online
[email protected]