Axad, July, 22,
2018 (HOL)– Iyadoo dhawaan guddiga Amniga Qaranka muddo 48 saac ah u qabteen in
lagu furo jidadka xiran ee magaalada Muqdisho ayaa xalay ilaa saakay waxaa laga
qaaday ciidamadii ku sugnaa inta badan Isgoys-yada magaalada.
Arrintan ayaa u sahashay in uu
mar kale dib u soo laabto isku socodkii gaadiidka dad-weynaha oo dhibaato weyn
markii hore ku qabay xirnaashaha iyo Koontaroollada tiro dhaafka ah ee
magaalada gudaheeda yaalay.
Goobaha ciidamada laga qaaday ayaa waxaa ka mid
ah Isgoysyada Sanca, Afarta Jardiino, Florence H/wadaag, Bakaaraha illaa
Tarbuunka.
Gadiidleyda qaarkood ayaa warbaahinta u sheegay
in jidadkan dhamaantood aan lagu arag xiligan wax ciidamo ah oo qabad ku ah isku
socodka dadka iyo gadiidka.
Dowladda Soomaaliya ayaa u muuqata in ay ka
jawaabtay cabasho is-daba joog ah oo maalmihii ugu danbeeyay-ba ka imanaya
qeybaha kala duwan ee bulshada ku dhaqan magalada Muqdisho oo sheegay in
xernaashaha jidadka saameyn ku yeesheen adeegyadii kala duwanaa ee dadweynaha.
C/raxmaan
Diini, Hiiraan Online
[email protected]
