Raila Odinga oo sheegay in maanta oo Talaado ah loo dhaarinayo xilka madaxtinimada dalka Kenya
Talaado, Janaayo, 30, 2018 (HOL) – Hogaamiyaha mucaaradka
dalka Kenya Raila Odinga ayaa sheegay in
maanta oo tallaado ah loo dhaarin doono xilka madaxtinimada, taasoo xiisad weyn
ka dhax abuurtay gudaha dalka Kenya gaar ahaan magaalada Nairobi.
Mas’uuliyiinta isbaheysiga mucaaradka ee Kenya ayaa sheegay in xafladda
dhaarinta ay maanta ka dhici doonto beerta xorriyadda ee Uhuru Park, halkaa oo
la filayo in lagu dhaariyo Raila Odinga iyo ku xigenkiisa Kalonzo Musyoka.
Mucaaradka Kenya ayaa warbixin ay dhawaan soo bandhigeen ku shegeen inay
ku guuleysteen doorashadii bishii 8aad ka dhacday Kenya, taasoo maxkamadda ugu
sareysa dalka ay waxba kama jiraan ka soo qaaday.
Xeer ilaaliyaha guud ee Kenya, Githu Muigai oo ka hadlay qorshaha ay
damacsanyihiin mucaaradka ayaa sheegay in tallaabadaasi ay tahay qiyaano qaran,
ayna horseedi karto dil toogasho.
Booliska Kenya ayaa sidoo kale mamnuucay xafladda dhaarinta Raila Odinga,
iyagoo na isku gedaamay fagaaraha Uhuru Park.
Hogaamiyeyaasha Mucaaradka ee Kenya ayaa sidookale sheegay in dowladda
Kenya ay ku guuldareysatay inay wax wadahadal ah la furto isbaheysiga
mucaaradka.
Mucaaradka Kenya ayaa qaadacay ka qeyb galka doorashadii ku celiska ee
bishii Oktoobar ee sannadkii hore ka dhacday Kenya, kadib markii ay shegeen in
aysan ku qanancsaneyn qaabka ay wax u wadaan guddiga doorashada ee IEBC.
C/raxmaan Diini, Hiiraan Online
[email protected]